Kim Kielsenip Aleqa paarlassavaa

Avatangiisinut pinngortitamullu naalakkersuisoq Kim Kielsen, Siumut, Naalakkersuisut siulittaasuugallartutut ivertinneqassaaq aamma ullumi marlunngornermi.

Naalakkersuisut siulittaasuata Aleqa Hammondip Naalakkersuisunit Inatsisartuniillu sulinngiffeqannginnissamik qinnuteqaammini ima allappoq:

- Inatsisartut qinnuteqaatiga ilassilluassappassuk, Naalakkersuisut siulittaasuata tullia, peqqissutsimut, attaveqarnermullu naalakkersuisoq paaseqatigalugu ilisimatitsissutigisinnaavara, Pinngortitamut avatangiisimullu naalakkersuisoq, Kim Kielsen, sulinngiffeqarnerma nalaani maannakkut akisussaaffigisami saniatigut Naalakkersuisut siulittaasuattut atorfik isumagissagaa.

- Isumaqarpunga, Inatsisartut inatsisaanni nr. 26-mi 18. november 2010-meersumi, paragraf 22, imm. 3 naapertorlugu Inatsisartunut Naalakkersuisunik nutaanik inissitsitertoqarnissaanut pissutissaqangitsoq, Aleqa Hammondip sulinngiffeqarnissamik qinnuteqaammini ilaatigut allappoq.

Kim Kielsen avatangiisinut pinngortitamullu naalakkersuisunngorpoq Partii Inuit naalakkersuisooqataajunnaarmat novembarip tallimaani 2013-mi. Siverth K. Heilmann ullormi tassani aamma ineqarnermut naalakkersuisutut ivertinneqarpoq.

Qinnuteqaat akuerineqassaaq
Siumumeersup Aleqa Hammondip Naalakkersuisunit Inatsisartuniillu sulinngiffeqarnissamik qinnuteqarpoq aningaasanik atuisimanera pillugu kukkunersiuisut qulaajaaneranni. Kukkunersiuinermut Ataatsimiititaliap isumaliutissiissutaa suli naammassineqanngilaq. Taanna Naalakkersuisut siulittaasuat ammaalluni oqalugiareerpat saqqummiunneqassaaq.

Kukkunersiuinermut Ataatsimiititaliamit nalunaarutigineqartareerpoq Aleqa Hammond nunatta karsianit 106.363,27 koruuninik namminerminut ilaquttaminullu atuisimasoq. Taakku maajip 28-anit 2013-mit maajip 21-anut 2014-mut aningaasat atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.