Kim Kielsenimut allagaq ammasoq: Peqqinnissaqarfik iluarsartuuguk
Naalakkersuisut Siulittaasuat peqqissutsimuinnaq naalakkersuisumik ivertitsissasoq, Partii Naleraq piumasaqarpoq.
Partii Naleqqap siulittaasuata allakkani ammasuni ersarilluartumik isornartorsiuilluni, Kim Kielsen (S) peqquaa peqqinnissaqarfimmi atugassarititaasut pitsanngorsassagai.
- Tassalu innuttaasut amerlasoorpassuit nappaamminnik piaartumik ikiorneqarsinnaanermillu pisariaqartitsigaluarlutik ikiorneqarsinnaasannginnerat, uniinnarluta isiginnaaginnarnagu ataatsimoorluta iliuuseqarnissamik kissaateqarfigaatsigit, sukkasuumik aaqqiissuteqaqqullutit, tassalu Peqqinnissaqarfimmut Naalakkersuisoq tassungaannavik sulialik ikkuteqqullugu, allakkani ammasuni allaqqavoq.
Maalaarutit arlallit tusarsimavai
Sermitsiaq.ag-p siornatigut allaasereriigaatut pilattaasunut utaqqisutut allattorsimasuutigineqartut oktobarip aallaqqaataani 4.142-pput. Utaqqisulli allattorsimaffiat kisiartaalluni ajornartorsiutaanngilaq, Hans Enoksen (PN) isumaqarpoq.
- Nunatsinni innuttaasut assorujussuaq nakorsiarniarnerminnik ilungersunartumik eqqugaasimasut amerlapput, tamannalu piaartumik isumannaatsumillu napparsimasut peqqinnissaqarfimmut saaffiginnittarnissaat sulissutigisariaqalerparput. Isorliunerusuni nunaqarfinnilu napparsimasut killeqartorujussuarmik ikiorneqarlutik pineqarnerat naammagiinnarsinnaajunnaarparput.
- Sinerissami najugallit innuttaaqatigut assut ilungersunartumik peqqinnissaqarfimmi sullinneqarlutik naammagittaallioriartuinnarnerat malunnarsigaluttuinnarpoq, allaat napparsimasut ikiortariaqaraluarlutik angerlartiinnarneqartarlutik, tamannalu ilaatigut kinguneqartarluni napparsimasunut taamaallaat nipaallisaatinik nakorsaasiiginnarnikkut.
- Ilaatigullu sukumiisumik misissorneqaratik angerlartiinnarneqartarlutik, tamatumalu kingunerisarpaa napparsimasut arlalissuit nalaattagaat ilaatigut toqumik kinguneqartarlutik. Aammalu sukumiinerusumik misissorneqaratik ullorpassuarni napparsimareersut nakorsamik misissorneqarnermikkut paasineqartarlutik allaat nappaamminnik ikiorneqarsinnaajunnaarsimallutik. Sinerissami najugalinnut pissutsit taama ilungersunartigisut peqqinnissaqarfimmi aaqqiiffiginiartariaqalerput.
Nappaassuaq kræfti
Nunat avannarliit sanillersuuffigineri takutippaat Nunatsinni nappaassuarmik kræftimik toqquteqaratarnissaq nunanit allanit ilimanaateqarnerusoq. Tamatuma saniatigut nunatsinni kræftimik napparsimalersartut aamma amerleriarsimapput.
- Nunatsinni nappaassuaq kræfti annertusigaluttuinnarpoq, taava sukumiisumik misissueqqissaarnerit aamma ilanngullugit aallartittariaqalerput, sooruna taama atugaqalersimasugut, sooruna inupparujussuit nappaammik eqqorneqaqattaartut taama amerlatigisut, sinerissami tamani nappaammik misissueqqissaarnerit aallartittariaqalerput, tamannalu aningaasalertariaqalerparput, Hans Enoksen (PN) allappoq.