Siumut
Kim Kielsen Siumumi aamma siulittaasoorusuppoq
Doris Jakobsen aamma Kim Kielsen nalunaartareerput Siumumi siulittaasutut qinigassanngortipput
Aleqa Hammond Siumumi siulittaasutut pingasunngornermi tunuarpoq. Partiimi politkkerit marluk nuimasut siulittaasutut qinigassanngortinniarlutik nalunaaruteqarput.
Inatsisartuni Folketingimilu ilaasortaq Doris Jakobsen sisamanngornerup ullaavani nalunaarpoq qinigassanngortinniarluni.
48-nik ukioqartoq Kim Kielsen aamma siulittaasutut qinigassanngortinniarluni nalunaaruteqarpoq.
- Siumumiit inuiaat aammalu inuiaqatigiit qanoq sullinneqassanersut ersarissumik anguniagaqarto-qarnissaa pisariaqarpoq, nunarput nammaqatigiilluni ataatsimoortumik ineriartortinneqassanersoq, aalajangiinerni inuit tamarmik akooqataatinneqarlutik – nunatsinni sumi najugaqarnerat apeqqutaatinnagu, Kim Kielsen tusagassiutinut nalunaarummi allappoq.
- Siumut aalajangiisinnaassuseqartumik, anguniagalimmik iliuuseqarsinnaassuseqartumillu siulersorteqartariaqarpoq, Inatsisartuni, kommunini nunaqarfinnilu ataatsimoorussamik aalajangiinernik naaperiutinillu ataatsimoortitsisinnaasumik, taamaasilluni politikki ataatsimoorfiulerluni aammalu piumassuseqartumik aaqqiiniarluni suliniarfiulerluni, Kim Kielsen oqarpoq nangillunilu:
- Kikkut tamarmik siuariartornermut, ineriartornermut attanneqarsinnaasumillu aaqqeerusuttut ilaseraakka, nunatta silarsuarmioqataanitsinnik alloriartikkumallugu. Inuiattut ataatsimoortariaqarpugut. Ataatsimoornerput nukittorsartariaqarparput. Pilersikkusuppavut inuiaqatigiit tamanut inissaqartitsisut sumi inunngorsimaneq, qalipaat, kulturi, upperisaq imaluunniit oqaatsit apeqqutaatinnagit.
Misilittagartooq
Kim Kielsen avatangiisinut pinngortitamullu naalakkersuisunngorpoq Partii Inuit naalakkersuisooqataajunnaarmat novembarip tallimaani 2013-mi. Siverth K. Heilmann ullormi tassani aamma ineqarnermut naalakkersuisutut ivertinneqarpoq.
Qaqagu Siumumi immikkut ittumik ataatsimeersuartoqassanersoq suli aalajangiunneqanngilaq.