Qaasuitsup Kommunia

Kim Kielsen: Qaasuitsoq avitsinermut nammineq akiliissaaq

Naalakkersuisut siulittaasuat, Kim Kielsen (S), aalajangiisuussagaluaruni Avannaani kommunip avinneqarneranut kommuni nammineq akiliissagaluarpoq

Naalakkersuisut siulittaasuat Kim Kielsen (S)

Ukioq kingulleq marsimi Qaasuitsup Kommuniani innuttaasunut kommunip avinneqarnissaanut missingersuummik taasititsisoqarmat amerlanerussuteqartut 'angerput'.

Kisianni kommunip avinneqarnera kommunimut akisusinnaavoq. Tassami Naalakkersuisut siulittaasuat, Kim Kielsen (S) oqarpoq, nunatta karsia kommunip avinneqarneranut tapeeqataassaganngitsoq.

'Kingunerisinnaasat ilisimaneqarnissaat pingaaruteqartoq'
Naalakkersuisut siulittaasuat Nalaakkersuinikkut Ataqatigiissaarisoqatigiit, Naalakkersuisunut ilaasortanit tamanit borgmesterinit sisamaasunit kiisalu Kanukokami siulittaasumit inuttaqartoq ataatsimeeqatigereerneranni oqaaseqarpoq.

Atuaruk: Qaasuitsoq: Kommunep avinnissaa amerlanerussuteqarluartut taperserpaat

- Naalakkersuisut soorunami Qaasuitsup Kommuniata avinneqarnissaanik kissaatigisaq maluginiarsimavaat. Pingaaruteqarpoq kommunip avinneqarnerani kingunerisinnaasat ilisimaneqarnissaat. Taamaattumik tamanna pillugu misissueqqissaarisoqarnikuuvoq Inatsisartunut ingerlateqqinneqartussamik, Kommuneqarfik Sermersuup avinneqarnissaa pillugu assingusumik misissueqqissaarineq ilanngullugu, Kim Kielsen ataatsimeereernerup kingorna nalunaarummini oqarpoq.

Nammineq aningaasalersorlugu
Naggataatigut Inatsisartut kommuninik aaqqissuussaaneq isummerfigisussagaat Kielsen erseqqissaavoq.

Ilisimaneqartutulli avitsinissamut inatsimmik siunnersuuteqartoqaqqaarnissaa pisariaqarpoq. Avitsisoqalissappallu nunatta karsiata borgmesterip allaffiinut nutaanut akiliissanngitsoq Kielsen oqarpoq.

- Kommunit kommuninut marlunnut arlalinnulluunniit avinneqarnissamik ujartuisut, Naalakkersuisut naliliinerat naapertorlugu taamatut avitsineq namminneq aningaasalersortariaqarpaat. Tamakkununnga aningaasartuutit nunap sinneranut aningaasanut inatsit aqqutigalugu tutsinneqartariaqanngillat.

Atuaruk: Ole Dorph: Kommuni avinneqassaaq

Qaasuitsup Kommunia avinneqassanersoq ukioq kingulleq marsimi taasisoqarmat taasisinnaasut 79 procentii avinneqarnissaanut angerput, 21 procentit naaggaarput.

Taasisinnaasut 52 procentii taaseqataapput.

Kommunip avinneqarnissaanut allaaserisat tamarmik uani atuakkit

Powered by Labrador CMS