pinngortitaq avatangiisillu

Kim Kielsen: Nunatta nukissiutinik atuinera annertusiartussaaq

- Nukissiutit ataavartut sualummillu erngup nukiganik atuinerulernissaq Naalakkersuisut siunnerfigiuassavaat, avatangiisinut pinngortitamullu naalakkersuisoq Kim Kielsen oqarpoq

Avatangiisinut pinngortitamullu naalakkersuisoq Kim Kielsen, Siumut

CO2 pillugu tusagassiuutini assigiinngitsuni ullut tamaasa sammineqartarpoq, ilaatigut silaannaap kissatsikkiartornera pissutaalluni nukissiutinik atuineq annikillineqarnissaa piumasarineqartarluni.

CO2-mik aniatitsinerup qanoq siunissami annikillineqassanersoq Inatsisartuni ilaasortap Michael Rosingip paragraf 37 aqqutigalugu akineqaqqammerpoq.

- Naliginnaasumik nukissiutinik atuinerujussooreersup saniatigut suliffeqarfissuaqarnerulernissamik ilimasunnerup nassatarisaanik Nunatsinni nukissiutinik atuisoqarnerulernissaa naatsorsuutigineqassaaq. Taamammat periarfissat naapertorlugit nunatsinni nukissiutinik atuinerup apparsarneqarnissaanik siunniussaqartuarissaq, nukissiutinillu atuilluarnerulernissaq Naalakkersuisut avatagiisinut politikkerissavaat, avatangiisinut pinngortitamullu naalakkersuisup Kim Kielsenip Michael Rosingip paragraf 37 naapertorlugu apeqqutaanut nassuiaavoq.

- Taamaammat nukissiutit ataavartut sualummillu erngup nukiganik atuinerulernissaq Naalakkersuisut siunnerfigiuassavaat, Kim Kielsen oqarpoq.

Ineriartortitsisoqassava?
- Ukiormi 2013-imi nunatsinni erngup nukissiorfiisa tallimassaat Paakitsumiittoq ammarnersiorneqarpoq, tamatumalu kingunerisaanik Nukissiorfiit innaallagissamik kiassarnermillu tunisaasa nalingi 2012-imi 70 procentii nukissiutit ataavartuneersunngorput CO2-millu aniatitsiviusuunatik.

- Nukissiutit ataavartut inerisarneqartuarnissaat siunertaralugu erngup nukissiorfiliortoqarnissaanut misissueqqaarnissamut aningaasaliissutit taamaammat aningaasanut inatsimmi immikkoortitsisoqarpoq, tassanilu erngup nukissiorfiit pioreersut pisariaqarfiini suli inerisarneqaqqissinnaanissaat inissaqartinneqarluni.

2013-imi ukiassaraa nunarput tamakkerlugu silap pissusaa pillugu Naalakkersuisut paasitsitsiniaapput, tassanilu ikummatissat uulianeersunik atuinerput, CO2-millu aniatitsinitta imminnut atassuteqaqatigiinnerat paasititsiniutigineqarmat ilaatigut ima oqariartuuteqartoqarpoq:

'Uulia/benzina/diesel-iluunniit liiteri ataaseq CO2-mik 2,5 kiilumik aniatitsinermik kinguneqassaaq. Taamaammat sapinngisat tamaat sipaarit.

Powered by Labrador CMS