naalagaaffeqatigiinneq
Kim Kielsen: Nunatsinni ilungersunartoqarnera qularutissaanngilaq
Naalagaaffeqatigiinneq pillugu Naalakkersuisut siulittaasuat Kim Kielsen Siumumeersoq oqaaseqaateqarpoq
Peqatigiiffik Naalagaaffeqatigiiffimmit pingaartutut isigineqarpoq Kalaallit Nunaata sukkut tamatigut pitsaasumik ineriartortinnerani innuuttaasut pimoorullugit ilanngunneqarnissaat. Tamannalu Kalaallit Nunaanni politikkerinut kajumissaarutigaat.
Naalakkersuisut siulittaasuata Kim Kielsenip isornartorsiuisoqarnera tallimanngormat akissuteqarfigaa.
- Qularutissaanngilaq nunatsinni nunattalu aqunneqarnerani annertuumik ilungersunartoqarmat. Saaffiginnissutissinni Kalaallit Nunaanni ilungersunartut pingaaruteqartut taakkartorpasi. Ilungersunartut allat tassaapput assersuutigalugu suliffissaqartitsiniarluni aamma aalisartut piniartullu namminersortut inuuniuteqarsinnaanissaannik qulakkeerinninnissaq, Kim Kielsen tusagassiuutinut nalunaarummi oqarpoq, nangillunilu:
Naalakkersuisut politikkikkut Siumut, Demokraatit Atassutillu akornanni isumaqatigiissuteqarnermikkut aaqqissuussinissamut pilersaarutit, pineqartuni iliuuseqartariaqarneq allallu tikkuartorneqarput, ilutigitillugu piumasarineqarluni inuiaqatigiit pisariaqartitaannik tamakkiisumik akisussaassuseqartumillu aaqqiissutissarsiortoqassasoq.
Suleqatigiinneq
- Suliniuteqarneq ilaatigut danskit naalakkersuisui qanittumik suleqatiginerisigut ingerlanneqarpoq, ataavartumik pitsaasumillu oqaloqatigiinneq ingerlanneqarluni danskit naalakkersuisuisa ministereqarfii aqutsisoqarfiilu suleqatigilluarlugit. Naalakkersuisut danskillu naalakkersuisuisa akornanni suleqatigiilluarnerup apeqqusersorneqarnissaa ajuusaarutigissaqaara. Akissummili matumani apeqqusersuineq nungutissimaniartussaassaaq, Kim Kielsen oqarpoq.