NunaMinerals
Kim Kielsen Nunaminerals pillugu: Annannissartik qulakkeersimanngilaat
Nunamineralsip akiliisinnaajunnaartutut nalunaarutigineqarnissaminik qinnuteqaamminik utertitsinera Naalakkersuisut siulittaasuata imatorsuaq tipaatsuutiginngilaa
Nunaminerals tallimanngormat nalunaarpoq selskabip akiliisinnaajunnaartutut nalunaarutigineqarnissaminik qinnuteqaanni utertikkaa, akilersuinerminillu unitsitsiinnarluni.
Tamannali pissutigalugu Naalakkersuisut siulittaasuata Nunaminerals pillugu isumaa allanngunngilaq.
– Tamanna tusaatissatut tiguvarput, piumasaqaataallu misissussavagut. Annannissartik qulakkeersimanngilaa, maannali tamatumunnga periarfissaqalerput, Naalakersuisut siulittaasuat Kim Kielsen oqarpoq.
Takujumaarparput
Aasaq qaangiuppat Nunaminerals suli atassava?
– Takujumaarparput, piffissap aggersup tamanna takutikkumaarpaa, Kim Kielsen, Siumut, oqarpoq.
Steen Lynge Atassummeersoq isumaqarpoq ingerlatsiviup nutaamik annaanniarneqarnera innuttaasunit akilerneqassanngitsoq.
– Nunamineralsip ingerlalluarnissaa kissaatiginartipparput. Siusinnerusukkulli oqarsimavugut aningaasatigut ikiorsernera iluaqutaanngippat tamanna unittariaqartoq.
Aningaasanik amerlanerusunik akeqassanngilaq
– Nunaminerals ujaasinermik ingerlatsiviuvoq pingaarutilik, ilisimasaqarluartorlu. Aningaasaqarnikkulli ingerlanerliorpat naatsorsuutigineqassanngilaq pisortanit annaanniarneqassasoq, Steen Lynge oqarpoq.
Akiliisinnaajunnaartutut nalunaarutigineqarnissamik qinnuteqaatip tunuartinneqarnera Inuit Ataqatigiinneersup Naaja Nathanielsenip ilalernartippaa.
– Tamanna tusaqqammerakku imatorsuaq oqaasissaqarfiginngilara. Pissanganarpaseqaarli, taanna oqarpoq.
– Pitsaasuuvoq immaqa aaqqiissutissamik nassaarsimammata, iluatsitsilluarnissaannik kissaappakka, Naaja Nathanielsen naggasiivoq.