eqqaaniut

Kim Kielsen: Meeqqat pisinnaatitaaffiinik illersuisoq toquvoq

Naalakkersuisut siulittaasuat Kim Kielsen Gerda Vilholmip toquneranut atatillugu eqqqaaniummik nassiussivoq. ''Uummateqarluartuuvoq ingammik meeqqat pisinnaatitaaffiilu pillugit'', Kim Kielsen allappoq.

Gerda Vilholm inuusimavoq qanilaartoq inoqatiminut ajunngitsuliornissamik Tasiilamilu inuiaqatigiinnut asaqisaminut iluunngarluni iliuuseqarusuttoq, Kim Kielsen Gerda Vilholm sapaatip akunnerani kingullermi toqusoq eqqaaniarlugu allappoq

Naalakkersuisuni aliatsaatigisatsinnik tusartinneqarpugut Gerda Vilholm toqusimasoq. Tasiilaq taamaasilluni inummik sullissilluartumik toqukkut annaasaqarpoq.

Gerda Vilholm 1984-imi Tasiilamiilerpoq silasiutinik pullartanik qullartitsisartunngorluni. Telestationimi 1987-imi pisortanngorpoq atorfigalugulu 1989-ip tungaanut. Gerda Vilholm suliarpassuaqarpoq 1990-imilu atuagaarniarfeerannguaq Neriusaaq ammarpaa ilaatigut takornariat ornitassaqarniassammata. Atuagaarniarfinnguaq meeqqat inuusuttullu aamma katersuuffigisalerpaat inuusuttullu arlaqartut allaffimmiutut ilinniartuuffigisarsimallugu.

Gerda Vilholm uummateqarluartuuvoq ingammik meeqqat pisinnaatitaaffiilu pillugit. Meeqqat atugai pillugit qasusuilluni sulisimavoq periarfissaqaraangamilu meeqqat pisinnaatitaaffii pillugit oqaluttuarnissamut tunuarsimaarneq ajorluni. Amarngivat siulersuisuini ilaasortaasimavoq akissaatikitsullu meeraasa atuanngiffeqarlutik angalanissaannut aningaasaateqarfinnut qinnuteqaasiornernut ikiuuttarsimalluni. Tasiilami innuttaasut allat peqatigalugit naluttarfissamut 2010-mi katersuiniarnermik aamma aallartitseqataavoq.

Gerda Vilholm inussiarnersuusimavoq oqaatsillu pillugit immikkut piginnaasaqarsimalluni. Ilitsoqqussaralugu danskisut oqaatsimi saniatigut tuluttut tyskisullu oqalussinnaalluni siullermik kitaamiusut ilikkarpoq Tasiilamut pinngikkallarami Narsarsuarmi silasiutinik pullartanik qullartitsisartuunermini kujataamiusut oqaluttalerami. Tasiilamilu Tunumiusut aamma oqaluttalerpoq.

Inuiaqatigiinnik soqutigisaqarnini tunngavigalugu najukkami politikkimik aamma suliaqalerpoq.

Gerda Vilholm qiimasutut tunniusimasutullu eqqaamaneqassaaq. Inuusimavoq qanilaartoq inoqatiminut ajunngitsuliornissamik Tasiilamilu inuiaqatigiinnut asaqisaminut iluunngarluni iliuuseqarusuttoq. Gerda Vilholm 73-inik ukioqarluni toquvoq.

Gerda Vilholmip eqqaamaneqarnera ataqqinartuuli.

Naalakkersuisut siulittaasuat Kim Kielsen

Powered by Labrador CMS