Siumup ataatsimeersuarnera
Kim Kielsen: Avissaartuunnermit ingerlariaqqissaagut
Partii eqqissisariaqartoq, Siumup siulittaasua isumaqarpoq. - Ingerlariaqqissangutta, aaqqissutissamik ujartuisariaqarpugut, Kim Kielsen siulittaasutut oqalugiarnermini ilaatigut oqarpoq.
- Ulluinnarni politikkikkut suleriaaseq ilaatigut isornartorsioruminarsinnaasarpoq, aammalu isumaqarnarsinnaasarluni Siumup takorluungaasa anguniangaasalu erseqqinnerusumik anguniarneqarnissaat, taamaattoq isumaqatiginninniartariaqartarpugut.
Siumup siulittaasua Kim Kielsen, ullumi pingasunngornermi Siumup ataatsimeersuarnerani oqalugiarnermini ilaatigut oqarpoq.
Taamaasilluni partiimi eqqissisimanerulertoqarnissaa, taassuma neriuutigaa.
Atuaruk: Ilulissat Siumut: Vittus aamma Kim namminiilivinnissamut suleqatigiissapput
Kim Kielsen: Partii qajannaannerussaaq
- Inatsiartuni amerlanerussuteqannginnatta kisermaassisuunngilagut, killormuanilli partiinik allanik qanimut suleqateqarpugut, tassungalu tunngatillugu taakku isumaat aamma ataqqisariaqarlutigit, naalakkersuisoqatitsinnilli suleqatigut taakku pissaanermik tigumminneqataasut isumaqitiginiartuarpagut, Naalakkersuisut siulittaasuat erseqqissaavoq.
Taamaasilluni taassuma neriuutigaa partiip siunissami qajannaannerunissaa.
- Nunatsinni partiini annersaavugut. Partii nukittunerulerlunilu qajannaannerulissaaq. Pingaaruteqarpoq partiitta iluani assigiinngitsunik isummersorsinnaaneq. Ataatsimoornitsinnillu aserorterinnginnissaa sillimaffigissavarput, Kim Kielsen ilaatigut oqarpoq.
Assit takukkit: Nuna tamakkerlugu ataatsimeersuarnermi Siumukkormiut aatsaat taama amerlatigisut