kunngikkormiut
Kim Kielsen aamma prins Christian kisimiillutik pinngortitami
Kunngissakkut siorna aasakkut Kalaallit Nunaanni angalaneranni Naalakkersuisut siulittaasuat aamma prins Christian akunnerni marlussunni kisimiillutik umiatsiaaqqamik angalaarsimapput
– Qeqertaq alianaatsoq Kalaallit Nunaat. Qeqertaq uummatikkut asalluinnagara. Sapinngisamik akulikitsumik ornikkusuttagara. Takornariatut oqaatigineqarsinnaalluarpunga, uangali nammineq ilaquttakkalu misigisimanerusarpugut angerlarsimaffitta aappaanut tikilluta. Taamatut kunngissap Frederiup Kalaallit Nunaat asasani pillugu Billedbladet-imut sapaatip akunnerani uani saqqummersumut oqaluttuarpoq.
Billedbladet quppernernik arfineq-pingasunik takissusilimmik Japanimit assitalinnik allaaserisaqarpoq, marsip 26-anniit 28-annut kalaallit kulturimik niuernermillu nittarsaassineranni Kunngissakkut peqataanerannit. Billedbladet-ip kunngissakkut qallunaat aallartitaqarfiata naatsiiviani naapisimaarsimavai.
Tassani kunngissap ilaatigut siorna aasakkut Kalaallit Nunaannut tikeraarnertik oqaluttuaraa, tamatumani aamma Naalakkersuisut siulittaasuat Kim Kielsen, Siumut, peqatigalugu aavariarsimalluni.
Kim Kielsen aamma prins Christian kisimiillutik
– Kim Kielsenip ernerput Christian kisimeeqatigalugu umiatsiaqatigaa, uanga Kimip jornguisa ilai ilagalugit timaani tuttunniartugut, kunngissaq oqaluttuarpoq.
Kunngissap nulia Mary oqaluttuarpoq prins Christian umiatsiaasareernermik kingorna nuannisarsimaqaluni tikissimasoq.
– Misigisaq annertusimaqaaq. Tikippoq isai ammalortuinnaallutik, kunngissap nulia oqaluttuarpoq.
Naalakkersuisut siulittaasuat Tokyomi oqalugiarnermini oqaluttuarpoq kunngissap nulia Mary Christianip, kunngissap Frederiup Kim Kielsenillu peqannginnerini ernumalluni utaqqisimasoq.
Sermitsiaq sapaatip akunnerani uani Tokyomit takisuumik allaaserisaqarpoq.