Skip to main content

Killiligaanngitsumik oineqaatissinneqartut peqqissimitissinnaatitaassapput

Herstedvesterimi killiligaanngitsumik pineqaatissinneqarsimasut Nuummi inissiisarfimmut nutaamut nuunnissaminnik aalajangersimagunik maanna peqqissimisinnaatitaalerput. Nuunnissamut periarfissaq ajornannginnerulersissagaa, Pinerluttunut Isumaginnittoqarfimmi pisortaq naliliivoq.

Killiligaanngitsumik pineqaatissinneqarsimasutut Herstedvesterimit Nuummut nuunneqarnissaq toqqarsimatillugu, peqqissimisinnaatitaaneq maanna periarfissaatinneqalerpoq. Justitsministerip Søren Pape Poulsenip (K) inatsisissatut siunnersuummi saqqummiussaani tamanna atuarneqarsinnaavoq.

Pineqaatissinneqarsimasut Herstedvesterimit Nuummi inissiisarfimmut nuussinnaanerannik inatsisissatut siunnersuut periarfissiisuussaaq.

- Nuutsitsineq pineqartup akuersineratigut aatsaat pisinnaasoq siunnersuutigineqarpoq, tamannalu akuersissut nuutsinneqarnermi qaammatit arfinillit iluanni utertinneqarsinnaavoq, pineqartoq Herstedvester Fængselimut utertinneqarsinnaalluni, justitsministerip inatsisissatut siunnersuummi saqqummiussaani tamanna oqaatigineqarpoq.

Amerlanerusut periarfissinniarpaat

Peqqissimisinnaatitaaneq kalaallit kissaateqarnerat naapertorlugu inatsimmut ilanngunneqarpoq, Inatsisartut tusarniaanerup kingorna innersuutigereeraallu.

Taannalu pisinnaatitaaffik pineqaatissinneqarsimasunut 27-nut Herstedvesterimut inissinneqarsimasut qanoq amerlatigisut nuunnissamik aalajangernerannut aalajangiisuulluarsinnaavoq, Pinerluttunut Isumaginnittoqarfimmi pisortaq, Naaja H. Nathanielsen naliliivoq.

- Tassami Herstedvesterimit nuunniarluni aalajangerneq annertuujuvoq. Peqqisimisinnaatitaaneq killiligaanngitsumik pineqaatissinneqarsimasunut toqqissisimanermik annerusumik pilersitsivoq, amerlanerusut misiliinissannik tamanna kinguneqassaaq, taanna Sermitsiaq.AG-mut oqarpoq.

Tamatuma saniatigut pineqaatissinneqarsimasut assigiinngitsorujussuusut, Naaja H. Nathanielsenip oqaatigaa. Ilaat sivisoorsuarmik Danmarkimiinnikuupput, taamaalillutillu Nunatsinnut attaveqarnertik annaanikuullugu. Ilaat sivikitsuinnarmik tassaniinnikuupput. Ilaallu aninissamik Danmarkimi ingerlataqarsinnaapput, tamannalu unitsikkusukkunnanngilaat.

Taamaattumillu killiligaanngitsumik pineqaatissinneqarsimasut qanoq amerlatigisut Nuummi inissiisarfimmut nuukkusunnersut oqaatigiuminaappoq.

- Siunnersuut akuerineqariarpat, pineqaatissinneqarsimasut attavigissavagut, taamaalilluta erseqqisumik nuunnermut atatillugu atugassarititaasut nassuiarsinnaassagatsigit, Naaja H. Nathanielsen oqarpoq.

Tamatuma saniatigut aamma aallaqqaammut Herstedvesterimiiginnarniarlutik aalajangersimasunut periarfissaqarpoq. Inatsimmut oqaaseqaatini atuarneqarsinnaavoq, Nuummut nuunneqarnissamut periarfissaq ataannarumaartoq.

Inatsisissatut siunnersuut Folketingimi novembarip aallaqqaataani siullermeerneqassaaq, ukiullu nutaap aallartinnerani akuerineqarnissaa naatsorsuutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER