Killeqarfitsigut aporfissat naalakkersuisut misissoqqissaarniarpaat

Naalagaaffeqatigiit iluanni nuunniarneq atugassarisatigut pisariaqanngitsunillu ajornartorsiorfiusinnaasarpoq. Taamaattumik qallunaat naalakkersuisuisa maanna killeqarfitsigut aporfissat suussusersiornialerpaat.
Tamanna takuneqarsinnaavoq ministeriunerup Helle Thorning-Schmidtip Socialdemokratineersup Martin Henriksenimut, Dansk Folkeparti-meersumut, akissutaani.
– Savalimmiuni Kalaallillu Nunaanni oqartussaasut suleqatigalugit naalakkersuisut nunani avannarlerni killeqarfitsigut aporfissat, aammalu naalagaaffeqatigiit iluanni aporfissat, suussusersiorlugit misissulersimavaat, ministeriuneq allappoq.
Qallunaat ministereqarfii tamaremik aammalu Kalaallit Nunaanni Savalimmiunilu oqartussaasut misissueqqissaarnermi akulerutsinneqassapput.
– Suliamili tamatumani aamma qulaajaaffigineqaqataaffigisinnaavoq ministereqarfiit ataasiakkaat kiisalu savalimmiormiut kalaallillu oqartussaasuisa siunissaq eqqarsaatigalugu takusinnaalissagaat naalagaaffeqatigiinni nunani ataasiakkaani inatsisit suut pingaartumik sutigut siunertarineqanngitsumik kinguneqaateqartarnersut, Helle Thorning-Schmidt akissummini allappoq.
Martin Henriksenip apeqqutigisimavaa killeqarfitsigut aporfissanik naalakkersuisut misissuilerneranni Kalaallit Nunaanni Savalimmiunilu oqartussaasut paasitinneqarsimanersut.