Aalisarneq
Kilisaatit tallimat suliffissuartaqartut uninngaannartut
Kilisaatinik amerlavallaalersimapput, Sulisitsisut taama oqariartuuteqarput
Kilisaatit tallimat qaammat ataaseq sinnerlugu suliassaqarsimanngillat. Qaleralinnik, saarullinnik suluppaakkanillu aalisarnerit ukiormanna assut ingerlalluarsimapput.
Kisianni novembarimili pisassiissutaasut nungunneqarput. Taamaattumillu kilisaatit suliffissuartakinnik taaneqartunik aalisarnermik ingerlataqartuusut tallimat uninngaannalersimapput, Sulisitsisut tusagassiuutinut nalunaarutaanni allaqqavoq.
Video: Silarluttumi misileraalluni aalisarneq
Aalisartut pisassiissutit taama sukkatigisumik aalisarsinnaammatigit pitsaasuususoq, Sulisitsisut peqatigiiffiat isumaqarpoq.
- Kisianni aamma taamatut pisoqarneratigut ersersinneqarpoq aalisariutinik amerlavallaartunik peqartugut, aalisagassaassiisutit ukiuni tulliuttuni qaffanneqassagaluarpata atorsinnaasatsinnik, siulittaasoq Henrik Leth oqarpoq.
Kilisaatit ilaqqinneqassanngitsut
Taamaattumik taanna kaammattuuteqarpoq, aalisariutit amerlassusissaannut atatillugu eqqarsarluartoqassasoq.
- Amerlavallaarpata aalisarnerup iluani aningaasaqarniarneq ajortisinneqartussaassammat taamalu suliffiusinnaasut pisortanullu aningaasat nakkartussat ikilisarneqartussaassallutik, siulittaasoq Henrik Leth naqissusiivoq.