Aalisarneq
Kilisaatit Sisimiuni pitsanngorsaavigineqartut
Kilisaatit kommunip talittarfiani usingiarnissaminnut periarfissaqalerput.
Sisimiuni kilisaatit usingiarnissaat maanna pisariinnerulerpoq. Qeqqata Kommunia tusagassiuutinut nalunaarummi taama allappoq.
Kilisaatit marluk ataatsikkut Sisimiuni talittarfimmi usingiarsinnaanerannut periarfissaqalerpoq, tamanna kommunip nammineq aningaasaliiffigaa.
Containerinulli qerititsivinnut innaallagissamut aqqummik ikkussisoqarnissaa pisariaqarpoq, taamaalilluni usingiaanermi nioqqutissat qereqqaannassallutik. Containerinut qerititsivinnut innaallagissamut aqqutit saniatigut, innaallagissamut aqqutissaq containerit qerititsiviusut nillissusaasa nakkutiginissaanut modem-imik aamma peqarpoq.
Kommunip aningaasaqarnermut ataatsimiititaliaata taamaattunik kommunip talittarfiani innaallagissamut aqqutinik ikkussisoqarnissaa akuersissutigeqqammerpaa.
Talittarfimmi nutaami containerinut innaallagissamut aqqutinik ikkussinermi, Imarpikkoortaatinut talittarfimmi ullumikkut usingiaanermi atorneqartartumut, taamatullu umiarsuarnut assartuutinut RAL-imit atorneqartarnera patsisaalluni inissaaleqiffiusumut sanilliullugu, usingiaanissamut atugassarititaasut pitsaanerit sukkanerusullu anguneqassallutik.
- Raajat taamatullu aalisarneq annertusiartormat, kilisaatinut minnerunngitsumillu aalisarnermik inuussutissarsiortortatsinnut pitsaasunik atugassaqartitsinissaq pingaaruteqarpoq, borgmesteri Malik Berthelsen (S) oqarpoq.
- Umiarsuilli takornariartaatsit aasaanerani talittarfimmik atuisinnaanissamik periarfissaqarnissaat suli pingaaruteqarpoq, taamaattumillu talittarfinnut attuumassuteqartunik sammisaqartitsinerit tamaasa misissorneqarnissaat pingaaruteqarsimavoq, tamarmimmi inissaqartinneqassammata.