Aalisarneq
Kilisaatit nutaaliaanerpaat marluk 600 millioninik akillit
Polar Seafood aamma Qajaq Trawl manna tikillugu aalisarnermut annertunerpaamik aningaasaliissuteqaerput
Poalr Seafood aamma Qajaq Trawl oktobarip aallartinnerani aalajangerput kilisaatinik raajarniutinik nutaanik marlunnik pisaarniarlutik, umiarsuillu maanna Spaniami umiarsualiorfimmi Freire Shipyardimi sanallugit aallartinneqarput.
Kilisaat siulleq 2018-ip naalernerani tunniunneqassaaq, aappaalu ukiup affaata qaangiunneranni tunniunneqassalluni, umiarsuaatileqatigiiffiit paasissutissiipput.
Suliffissuit puttasut
Umiarsuit raajarniutaapput nutaaliaanerpaanik atortulinnik suliffissuartallit. Umiarsuit assigiit marluk taakkua 80 meterit sinnerlugit takissuseqarput 17 meterinillu silissuseqarlutik, motoorersuilu pingaarnerit 6000 kW-nik sakkortussuseqarput. Umiarsuit sumiissusersiutinik tunisassiornermilu atortunik nutaaliaanerpaanik pilersorneqassapput, qerititsiveqassallutillu ulloq unnuarlu raajanik 110 tonsinik qerititsisinnaasunik.
Umiarsuaq takornarniaruk
Polar Seafoodip Qajaq Trawlillu kilisaatitaassatik isumalluarfigisorujussuuvaat, umiarsuaatileqatigiillu marluullutik aningaasaliissutigisamik takutinnissaat qilanaaraat. Tamatumunnga atatillugu naatsorsuutigaat kilisaat siulleq Nuummut tikippat tamanut ammasumik takornarniartikkumaarlugu.
Tunisassiorneq annertusissavaat
– Kilisaatit nutaat atulernissaat qilanaaraarput, Qajaq Trawlimik piginnittoq Søren Brandt, Polar Seafoodimilu siulersuisut siulittaasuat Henrik Leth, tusagassiorfinnut nalunaarutikkut oqarput.
– Taakkua ingerlatsiviit tunisassiorsinnaanerannik nukittorsaaqataassapput taamaasillunilu nunatsinni raajarniarneq nunani tamalaani unammillernermi, naluneqanngitsutut sakkortusigaluttuinnartumi, nukittorsassallugu.
– Umiarsuit nutaat taamatut angissusillit atortorissaarutillillu ataaseq 300 millioner koruunit missaannik akeqarput. Aningaasarpassuupput, nuannaarutigaarpulli taama annertutigisumik aningaasaliissuteqarnissatsinnut periarfissaqarsimagatta. Kalaallit raajarniarnerannut pingaaruteqarpoq ineriartornermut malinnaasinnaanissarput aammalu Atlantikup Avannaani nukittuumik inissisimanitta attatiinnarnissaa, Søren Brandt Henrik Lethilu erseqqissaapput.