Kiisami: 4G Nuummi atulissaaq

Tele-Postip Nuummi sullissaasa bredbåndimik angallattakkamik 4G-mik maannamut nunatsinni bredbåndini angallattakkani sukkanersaasoq periarfissarilissavaat. Tamannali aallaqqaammut Nuummiinnaq atorneqarsinnaassaaq.

Bredbånd angallattagaq taanna decemberip aallaqqaataani atorneqarsinnaalissaaq siullermilli qarasaasiani aammalu qarasaasiaaqqani angallattakkani atorneqarsinnaassasoq, Tele-Post nalunaarpoq.

Bredbånd angallattagaq nutaaq premium 20 GB 20/5 Mbits-mik atuisinnaavoq. Tele-Postillu nioqqutini taanna nutaaq pitsanngorsarniarlugu suliniuteqarpoq, siullermik Nuummiinnaagallartoq pisiarineqarsinnaasoq.

Illoqarfiit allat
- 4G-mut Nuummi attaveqaateqalernissaa ilungersorluta sulissutigaarput, taamaalilluta qulakkeerumallugu atuisutta suli sukkanerusumik minnerunngitsumillu pitsaanerusumik atuisinnaanerat angallanneqarsinnaasuminngaanniit interneternerminni, soorlu qarasaasiamiit imaluunniit tablet-iminngaanniit, telemut pisortaq Anders Barslund oqarpoq.

4G oqarasuaatini angallattakkani atulissappat Tele-Postip pisiffigisakkani nutaamik isumaqatigiissusiorfigeqqaartariaqarpai. Isumaqatigiissutit inissinniarlugit suliniarneq aallartereerpoq.

Bredbånd angallattagaq 4G illoqarfinni allani aamma atorsinnaasunngortinniarneqarpoq taakkunani sukkassuseq assigiinngittassaaq apeqqutaaluni 4G-mut, 3G-mut imaluunniit 2G-mut attaveqaateqarnersoq.

- 2014-ip ingerlanerani mobiltelefonimik mobilt bredbåndimillu atuinerit allat 4G-p attaveqaataanut nuussavagut. Atuisut telefonertik atorlugu internetimi alakkartererujoornerminni pitsaanerusumik atugassaqartinneqarnerat tamatuma kingunerissavaa, Anders Barslund oqarpoq.