Nuuk

Kiinappalerlutik tillinniat marluk suli tigusarineqarsimanngitsut

Arfininngornermi ulloq 13. januar arnaq utoqqaq najugaqarfimmini angutinit marlunnit kiinappalersimasunit nakuuserfigitippoq. Suliamut atatillugu tigusarinnittoqarsimanngilaq

Politiit, arnamut utoqqarmut nakuuserluni tillinniartoqarsimaneranik, paasiniaanerat suli ingerlanneqarpoq.

Arnaq utoqqaq najugaqarfimmini, Nuup illoqarfittut ilaani Nuussuarmi Nuniaffimmi inissiani sungaartuni, angutinit kinnappalersimasunit marlunnit nakuuserfigitippoq.

- Suliamut atatillugu innuttaasumit saaffigineqarsimavugut. Suliamut atatillugu tigusaqarsimanngilagut, paasiniaanerillu suli ingerlapput, Nuummi Politiini pingaartuuneq Kunuk Frederiksen Sermitsiaq.AG-mut oqarpoq.

Atuaruk: Politiit nakuuserluni tillinniartunik takunnissimasinnaasunik ujartuipput

Politiit paasiniaanerminnut atatillugu ilisimannittunik Nuniaffimmi blokkit sungaartut eqqaaniissimasunik takunnissimasinnaasunik, tallimanngornerullu arfininngornerullu akornanni unnuakkut nalunaaqutaq ataatsip pingasullu akornanni tusaasaqarsimasinnaasunik sulialluunniit naammassineqarnissaanut paasissutissaatilinnit attavigineqarnissartik kissaatigaat

Nuummi Politiit oqarasuaat 70 14 48 sianerfigalugu attavigineqarsinnaapput.

Powered by Labrador CMS