politiinut ikiuineq
Kiinamiumik pisuttuartumik ujaasineq taamaatikkaat
Ulluni pingasuni qulimiguulimmik ujaarlernerit, kingusinnerusukkullu pisuttunik apersuinerit, takornariamik maqaasineqartumut politiit nassaarnerannik kinguneqartitsinngilaq
Politiit 27-inik ukiulimmi Yat Wui Cheungimik ujaasinertik taamaatinniarlugu aalajangerput.
Taanna takornariaq Kiinamiu Arctic Circle Trailikkut Sisimiut Kangerlussuullu akornatigut pisussimavoq, sisamanngornermilu 14. juuli 2016 Itinnermi kingullermik takuneqarpoq.
Kangimut pisuttoq
Tassani nerisassiorsimavoq. Takornariat marluk pisuttut taanna maqaasineqartoq, nuannaarlunilu uummaarissoq takusimavaat.
Tamatuma kingorna maqaasineqartoq kangimut pisulluni kuup avannamut sammisuatigut ingerlasimavoq.
Atuaruk: Takornariaq maqaasineqartoq
Yat Wui Cheung Aasiameersutut isarualittut oqaatigineqarpoq, sungaartumillu kavaajaqarnerarneqarpoq, sungaartumik aappaluartumik anginngitsumik nammatagaqarpoq aappaluttumillu taskeqarluni.
Qernertumillu saviminermik ajaappiaqarpoq.
Qulimiguullit ujaasisut
Piffissami arfininngornerup juulip 23-ani aamma ataasinngorneq juulip 26-ata akornanni politiit qulimiguulimmik ujaasisimapput.
Nuna Itillinnguup Kangerlussuup kujataaniittumit aamma Isortuarsummit avannamut, kiisalu sermersuarmut Kangerlussuup kangianut ujaasisoqarpoq, maqaasineqartorli nanineqanngilaq.
Takornarianik tassuuna aqqutikkut Sisimiuniit Kangerlussuarmut aamma Kangerlussuarmiit Sisimiunut pisuttunik arlalinnik apersuisoqarsimavoq, kisianni taanna maqaasineqartoq Kangerlussuup tungaani takuneqarsimanngilaq.
Inuit maqaasineqartumut Yat Wui Cheungimut paasissutissaateqarsinnaasut, Sisimiuni Politiinut oqarasuaat 701322-mut saaffiginneqquneqarput