Peqqinneq
Kigutinut nakorsaanermik atorfinitsitsiniarneq ajornakusoortorujussuaq
Peqqissutsimut Naalakkersuisoq januarip qaammataaniilli kigutinut nakorsaanissarsiortarsimangaluarpoq - iluatsitsinerlu ajorluni.
Atorfiup pingajussaanik inuttassarsiorneqarneranut piffissaliunneqarsimasoq qaangiuteqqammerpoq, naalakkersuisoqarfiullu neriuutigaa qinnuteqartut akornanni atorfimmut piukkunnartoqarnissaa.
Atorfik pingaarutilik
Atorfimmi pingaarutilerujussuusoq, Demokraatit paragraf 37 naapertorlugu Agathe Fontainimut apeqquteqaataani allassimavoq.
- Kigutinut nakorsaaneq Kalaallit Nunaanni tamarmi kigutilerinermik ataqatigiissitsisuuvoq taamaammallu
kigutilerinerup pitsaassusaannut ineriartorneranullu pingaaruteqarluni. Kigutinut nakorsaarneq kigutileriffiit assigiiaartuunissaannut
ineriartornissaannullu qulakkeerinninnissamut immikkut ittumik suliassaqarpoq, pissutigalugu kigutileriffinni amerlanerni kigutinut nakorsat taarserartorujussuummata. Kigutinut nakorsaanerup inuiaqatigiinni assigiiaartumik neqerooruteqarnissaq qulakkeertussaavaattaaq, Agathe Fontain akissuteqarluni allappoq.
Atorfik ukiup ataatsip missaani paarlattaangallartumik inuttaqartinnera pitsaanerpaajunngitsoq oqaatigaa, taamaattooq qularnaveeqqutaa paarlattaangallartoq suliassaminik naammassinnilluarsimasoq.
- Ataatsimut isigalugu Kalaallit Nunaannit kigutinut nakorsanik pissarsiortarneq sapernarpoq. Atorfiit amerlanersaat piffissami sivikitsumi atorfeqartunik aamma/imaluunniit kigutinut nakorsatut naammasserlaanik inuttalersugaapput. Kigutinut nakorsaanertut atorfimmut piumasaqaatit nalinginnaasumik kigutinut nakorsatut atorfimmut sanilliullugu qaffasinnerupput taamaattumillu qinnuteqarsinnaasut aamma killeqarlutik. Naalakkersuisut isumaqarput atorfiup pineqartup inuttalernissaa peqqinnissaqarfimmi aqutsisutut allatut atorfinnut sanilliullugu ajornarnerusimanngitsoq, Peqqissutsimut Naalakkersuisoq isumaqarpoq.
Suliassat pissaganartut
Atorfik ukiup tulliani 1. februar inuttalernissaa naatsorsuutigaa kigutinullu nakorsaaninngortussaq kigutilerinermi pissanganartunik suliassaqalertussaasoq, kigutilerinerlu pillugu periusissiaq nutaaq suliarineqartussaalluni kiisalu kigutilerineq nunap immikkoortuinut agguataarneqartussaalluni.