Kigutilerisussaaleqineq Atassummit ernumagineqartoq

- Atassummit paasiuminaatsitatsinnik ilisimalerparput kigutit nakorsai naammasserlaat nunatsinni, pingaartumik Nuummi, atorfininniaraluarlutik qinnuteqaateqartartut ilaatigut sulisinnaatitaanermut allagartaqannginnerat pissutigalugu itigartinneqartarsimasut.

Atassutip Inatsisartunut ilaasortaatitaat Knud Kristiansen Gerhardt Petersenilu oqarput.

Kalaallinik kigutilerisoqarpallaannginnera iliuuseqarfigineqaqquneqarpoq.

- Kinaluunniit ilinniareerluni naammasserlaaq sulisinnaatitaanermut allagartaqalersinnaanngilaq sulinermik misilittagaqanngikkuni, taamaammat kigutit nakorsaasa naammasserlaat nunatsinni sulilersinnaanissaminnut periarfissaannut pissutaatinneqartoq taanna atorfinitsitsinnginnissamut utoqqatsissutaasariaqanngitsoq Atassummit isumaqarpugut.

Politikkikkut oqariartuutit eqquunneqanngitsut
- Tamatuma saniatigut naalakkersuinermik suliaqartuusugut tamatta inuusuttortavut kajumissaartuartarpavut ilinniagaqaqqullugit atorfissaqarteqigatsigit, suliassaqarfinnilu inuiaqatigiinnut pigaaruteqarluinnartuni ilinniartut suli naammassinnginnerini nunatsinnut angerlaqqinnissaat siunertaralugu pilerisaarisarniannguarluta atorfissaqartinneqanngitsutut misigisimatittassagutsigit, pingaartumik nakorsat kigutillu nakorsaat amigaatigeqisagut matussusiisinnaasumik pigilersinnaanavianngilagut.

Paragraf 37 naapertorlugu Knud Kristiansen Gerhardt Petersenilu ima apeqquteqarput:

• Nunatsinni kigutit nakorsaat aalajangersimasumik atorfillit ullumikkut qanoq amigaatigineqartigippat?

• Sumiiffinni assigiinngitsuni kigutit nakorsaannik amigaateqarneq qanoq inissisimava?

• Kigutit nakorsaattut ilinniartut nunatsinneersut qassiuppat?

• Kigutit nakorsaat ilinniareernermik kingorna nunatsinnut angerlarlutik sulilernissaminnut periarfissaat qanoq annertutigippat?

• Kigutit nakorsaattut naammasserlaat nunatsinnut angerlarnissaannut tikilluaqqusisarneq qanoq pitsaanerulersinneqassanersoq Naalakkersuisut tikkuussisinnaappat?