Candys Foundation

Kigutileriffiit aningaasaliiffigineqartut

Candys Foundation 6 millioner koruuninik kigutileriffinni digitalimik qinnguartaasar­nermut atortunik atulersitsinissamut tapiivoq

Assi toqqorsivimmeersoq

Peqqissutsimut Naalakkersuisoqarfiup nalunaarut nuannersoq tigusimavaa, tassalu Candys Foundationip 6 millioner koruuninik kigutileriffinni digitalimik qinnguartaasar­nermut atortunik atulersitsinissaanut tapiisimanera.

Taama Namminersorlutik Oqartussat tusagassiuutinut nalunaaruteqarput.

Qinnguartaanermut atortunik, qinnguartaanermilu qarasaasiatigut programminik, assiliissutinik, qarasaasianik nutaanik siunissamilu qinnguartaasarne­rup peqqinnissaqarfimmi elektronikkikkut napparsimasut suliareriikkat allattorsimaffianut atatinneqartussamut pisinissamut aningaasaliineqarsimavoq.

Assinik ersersaasoqartarunnaassaq
Kigutit nakorsaanerata Olina Hansenip oqarnera naapertorlugu kigutileriffinni pilertortumik pitsaasumillu digitalimik qinnguartaasarnikkut assiliisinnaaneq atulissaaq.

- Ersersaasarneq pisariaarutissaaq, qarasaasiakkummi saqqummersillugit assit ingerlaannaq sullitamut ilaqutaasunullu takutinneqarsinnaalissammata. Qinnguartaanermi akuutissat atorun­naassa­gatsigit akuutissat aalaat pinngitsoorneqarsinnaalissapput, tamannalu kigutileriffinni sulinermi avatangiisinut pitsaaqutaassaaq, Olina Hansen oqarpoq.

Imalu nangippoq:

Aamma assiliiviit immikkut ittut aningaasaliivigineqarput
- Pinaveersaartitsinermik suliavut, kigulluut caries akiorniarlugu sulini­u­tis­satut siunniussami allaqqasut, eqqarsaatigalugit aningaasaliineq annertuumik iluaqutaasussaavoq. Assiliissutinik immikkut qarngup iluani assiliisinnaasunik pisinissamut tunineqarsimavugut, taamaasilluni suliaritittup malinnaavigisinnaalissavaa kigutimi misissorneqarneri. Angerlarsimaffimmi qanoq iliornissaminnut suullu eqqumaffigisariaqarneranik soqutiginninnerat, misissorneqarnerminni kiguserisut malinnaasinnaalerunik, sunniuteqarfigisinnaavaat.

Candys Foundation siornatigut kalaallit peqqinnissaqarfiannut Dronning Ingridip Napparsimaviata MR qinnguartaammik pisinerani tapersiisimavoq.

Powered by Labrador CMS