Angallanneq
Kiffartuussinissamut isumaqatigiissutit nutaat pillugit akerliussutsimik takutitsineq
Kujataamiut eqimattat aaqqissuussisuupput
Siullermik Naalakkersuisunut ammasumik allakkat, Kujataani kiffartuussinissamik isumaqatigiissutinut nutaanut atorunnaarsitsinissamik piumasaqaateqartut. Maanna aamma akerliussutsimik takutitsineq.
Angallannermut isumaqatigiissutip nutaap umiarsuarnerulersitsisussap naammagisimaannginneqarnera, ullumikkumit suli annerusumik sunniuteqassaaq.
Atuaruk: Akerliusut Knud Kristiansen oqaloqatigerusuppaat
Kujataani aamma akerliusut marlunngornermi nalunaaqutaq 16.30 isumaqatigiissutinut nutaanut Qaqortumi akerliussutsimik takutitsinissamut qaaqqusipput.
Atuaruk: Ilaasut timmisartorlutillu umiarsuartassapput
Pissutaasut arlallit
Isumaqatigiissutini nutaani assigiinngitsut arlallit aalassassutaapput:
- Ullumikkut angallassineq qulimiguulitsigut aaqqissuussaavoq. Taamaalillunilu ilaasut sikorsuaqartillugu angallanneqarsinnaasarput. Isumaqatigiissutini nutaani angallammik aamma qulimiguulimmik angallassisoqartassaaq, kisianni eqimattat sumiiffimmi angallammik aaqqiissutitut akuersaarsinnaannginnerarpaat.
- Ilaasut siunissami nerisaqarnerminnut aamma unnuinerminnut akiliisalissapput. Pisullu ilaanni umiatsiaq piffissaq eqqorlugu apuutsinnagu ingerlaqqissinnaajunnaarunik, Air Greenlandimut bilitsitik annaasinnaasassavaat. Tamanna januaarip aallaqqaataanit angalatitsiviit sumiiffimmi angallassilernissaannik pissuteqarpoq, Disko Line aamma Air Greenland, taakku illuatungimi ilaasuinut pisussaaffilersugaanngillat.
- Naggataatigullu akerliusut sumiiffimmi qinikkat aamma inuussutissarsiortut kiffartuussinissamut isumaqatigiissutit naammassinnginneranni ilanngunneqarsimanngimmata akerliussutigaat.
Atuaruk: Kommune Kujalliup kiffartuussinissamut isumaqatigiissut dumpertippaa
Akerliusut oqaaseqartartoraat siornatigut Kommuneqarfik Sermersuumi Siumumit kommunalbestyrelsimut ilaasortaq, Monica Dorph, akunnittarfimmi pisortaq Jim Riis kiisalu Kommune Kujallermi IA-mit kommunalbestyrelsimut ilaasortaq Stine Egede.