Skip to main content

Kiffartuussinermut isumaqatigiissutit takornariartitsisartut minnerit ulorianartorsiortippaat

Kiffartuussinermut isumaqatigiissutit nutaat kinguaattoortoqartillugu imaluunniit aallanngitsoortoqartillugu takornariartitsisartunik aningaasartuuteqartitserujussuarsinnaapput. Destination South Greenland taama isumaqarpoq

Kiffartuussinermut isumaqatigiissutit nutaat Kujataani takornariaqarnermut ulorianartorsiortitsivoq. Destination South Greenlandimi siulersuisuni siulittaasoq, Ditte Sorknæs taama isumaqarpoq.

Innuttaasut nunaqavissut angalanerminni ingerlaqqissinnaajunnaartillutik, unnuinerminnut akiliutsissinnaanerannut inatsit, takornariartitsisartunut minnernut akisusinnaavoq.

Unnuinermut akiligassitsissinnaasut
Ataatsimut aaqqissuussanik angalanernik nioqquteqarunik, tikeraartui assersuutigalugu angerlamut timmisartoq angumerinngitsoorunikku imaluunniit taamaatinneqarpat, akiligassamik tigusisunngorsinnaapput.

- Kujataani takornariartitsisartut amerlanerit namminersortuupput suliffeqarfiaraallutillu, taakku takornariaqarnikkut ineriartortitsinermik aamma suliffeqartitsinnermut assorooruteqartuupput, Ditte Sorknæs oqarpoq.

- Ulluinnarni ingerlatsinerminni nalorninartunik annertuunik artukkerneqarsinnaanngillat, kiffartuussinermullu isumaqatigiissutit nutaat taamatut pilersitsipput.

Atuaruk: Kiffartuussinermut isumaqatigiissummut 22 millionit saniatigut aningaasaliissutaasut

Takornarissat ajornerusumik inissinneqartut
Takornarissat ukiortaamit ajornerusumik inissinneqarnerata, takornariaqarneq ajoqusissagaa taanna isumaqarpoq.

- Ilaasortagut maanna annertuumik nalorninermik aamma isertitakinnerunissamik pilersitsivigineqariasaarput, Ditte Sorknæs oqarpoq.

Atuaruk: Kiffartuussinermut isumaqatigiissutit siornarnit akisunerulertut

'Suliamut annertuumut suusupaginninneq'
Tamanna tunuliaqutigalugu naalakkersuisoqatigiinnissamut isumaqatigiissummi allaqqammat assortuuttoqartoq, taanna isumaqarpoq: ''Naalakkersuisoqatigiit sulissutiginiarpaat takornariaqarnikkut ineriartortitsinissamut tunngavissat pilersinnissaat. Nunap immikkoortuini tamani silaannakkut imaatigullu angallannikkut pisariaqartitat annertusarnissaat aammalu inissiisarfeqarnikkut nunap immikkoortuini annertusaanissat''.

- Nunap immikkoortutsinni ukiuni kingullerni takornariaqarneq ineriartortinniarlugu, annertuumik suliaqarneq suusupaginiarlugu aalajangertoqarnera uagutsinnut pakatsinartorujussuuvoq, taanna oqarpoq.

Atuaruk: Kiffartuussinermut isumaqatigiissutit Wæverip kamaatigigai: Mattusersuilluni aaqqiinerit akisuut

Aaqqiipallannerit qatsunneqartut
Naalakkersuisut naalakkersuisoqatigiinnissamut isumaqatigiissummiittut oqaatsit kusanartut piviusunngortinniarlugit sulisariaqartut, taanna isumaqarpoq.

- Mattusersuilluni aaqqiipallannerit qatsuppagut. Pitsaasumik aaqqiinerit piumavagut, iluamillu paasissutissiinerit. Kujataani ineriartortitsisoqarlunilu suliffinnik pilersitsiortortoqassaaq, killormoortuaniunngitsoq, Ditte Sorknæs naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER