Angallanneq
Kiffartuussinermut isumaqatigiissutit pillugit ataasinngorpat nutaarsiassaqassaaq
Angallannermi kiffartuussinermut isumaqatigiissutit qanoq pitsanngoriartinneqassanersut, ullut pingasut qaangiuppata paasisaqarfigissavarput
Ataasinngornermi ullaakkut qulingiluanut angallassinermut kiffartuussinermut isumaqatigiissutit akerleriissutaasut pillugit nutaarsiassaqassaaq. Attaveqarnermut naalakkersuisoq Martha Lund Olsen (S) tusagassiortunik katersortitsinissamut qaaqqusivoq, tassani kiffartuussinermut isumaqatigiissutit pillugit paasissutissiissaaq.
Atuaruk: Knud Kristiansen: Isumaqatigiissutini periarfissanik amerlanernik ujaasivugut
Minnerpaamik 18 millioninik ilaneqassasut
Aningaasanut inatsisissatut siunnersuummi kingullermi saqqummiunneqartumi 18,1 millionit koruuninik immikkoortitsisoqarpoq, taamaalilluni Kujataani aamma Avannaani angallannermut isumaqatigiissutinut ilassutitut isumaqatigiissusiortoqarniassammat.
Partii Naleqqalli ilaatigut aningaasat amerlanerunissaat siunnersuutiginikuuaa. Taamaalilluni aningaasanut inatsimmik isumaqatiginninniut piariilersoq Martha Lund Olsenip aningaasat qanoq amerlatigisut atorsinnaanerinut appeqqutaassaaq.
Atuaruk: Kim Kielsen: Ajornerulertoqarnissaanik aarlerisaarinikuuvugut
Unnuisariaqalernermi akiliineq
Kiffartuussinermut isumaqatigiissutit sutigut pitsanngortinneqassanersut maannamut erseqqissumik oqaatigineqarnikuunngillat.
Kiffartuussinermut isumaqatigiissutinut isornartorsiutit ilaginikuuaat, ilaasut kinguaattoornermikkut unnuisariaqalissagunik nammineq akileeratartarsinnaanerat. Naalakkersuisut siulittaasuata Kim Kielsenip (S) oqamisaarutiginikuuaa, ilaasut pitsaanerusumik qulakkeerneqassasut.
Umiarsuartarnissaq akillu isornartorsiorneqartut
Kujataanilu angallannerup annertunerpaartaa umiarsuarmik pisarnissaa aamma isornartorsiorneqarnikuuvoq. Tamanna aaqqiiviginissaa ajornarnerusinnaassaaq. Qeqertarsuup Tunuani akit isornartorsiorneqarnerupput.
Atuaruk: Aningaasaqarnermut ataatsimiititaliap Naalakkersuisut akerlilersorpaat
Inatsisartut aningaasat amerlassusaannik aalajangiisut
Attaveqarnermut naalakkersuisuusimasup Knud Kristiansenip (A), isumaqatigiissutit 121 millionit koruuninik akeqarnissaat Inatsisartut suliareqqusimaneranik imminut illersorniarnikuuvoq.
Naalakkersuisut tamanna ajorseriarnermik kinguneqaratarsinnaaneranik Aningaasaqarnermut Ataatsimiititaliaq aarlersisaarsimavaat, ataatsimiititalialli upernaaq tamanna attatiinnarpaat.
Aningaasaqarnermut Ataatsimiititaliaq maanna saniatigut minnerpaamik 18 millionit koruuninik atuinissaminnut piareersimavoq.