Angallanneq
Kiffartuussinermut isumaqatigiissutit nuna tamakkerlugu akerliuffigineqalersut
Akerliusut novembarip arfineq-aappaanni akerliussutsimik takutitsinissamut qaaqqusipput
Angallannermut kiffartuussinermut isumaqatigiissutit akerleriissutaasut kinguneri suli ingerlapput.
Kujataani akerliusut angallannermi pitsaanerusumik aaqqiissuteqartoqarnissaanik piniarlutik maanna nuna tamakkerlugu novembarip 7-anni akerliussutsimik takutitsinissamut aggersaapput.
Assit takukkit: Qaqortumi akerliussutsimik takutitsisut aatsaat taama amerlatigisut
Isumaqaitigiissutit nutaat, Naalakkersuisut ingerlatseqatigiiffiillu marluk Disko Line aamma Air Greenlandip akornanni atsiorneqartut, ilaasunik, nassiussanik aamma allakkanik ukiumi nutaamit angallassinissamik qulakkeerinnittussat, arlalinnik pissuteqartumik akerleriissutaapput.
Isumaqatigiissutit nutaat qulimiguulimmik angallassinermit imaatigut angallassinerulernissaq qulimiguulimmik angallassinermik ilalerlugu ilaatigut imaraat, maanna angallanneq qulimiguulimmik annermik pisarpoq. Aamma ilaasut silap ajornera pissutigalugu kinguaattoornermi nerisaqarnermut unnuinissamullu akiliunneqarnissartik qulakkeerneqarunnaartussaapput.
Atuaruk: Brugsenip kiffartuussinermut isumaqatigiissutit ernummatigai
Aaqqiissut attassinnaasoq
Kiffartuussinermut isumaqatigiissutit politikerit iluarsissagaat akerliusut piumasaraat, taamaanngippat qinersisoqartariaqarnerarpaat.
- Naalakkersuisut periarfissikkaluarpagut torersumik illersorneqarsinaasumillu aaqqiissuteqarnissaannik, ullorpassuit utaqqivugut isumaqarluta naammaginartumik illersorneqarsinnaasumillu tusartinneqassalluta. Utaqqisinnaajunnarpugut! Kiffartuusinissamik isumaqatigiissut ajorseriaataanngitsoq, atuisussanut inuiaqatigiinnullu aningaasartorfiunerulersitsisussaanngitsoq perusupparput, Akerliusut tusagassiuutinut nalunaarummi naqissusiipput.
Atuaruk: Aningaasaqarnermut ataatsimiititaliap Naalakkersuisut akerlilersorpaat
Akerliusuni Monica Dorph aamma Stine Egede oqaaseqartartuupput.