Siumup ataatsimeersuarnera
Kielsenip ukkatai: Namminiilivinneq aaqqissuusseqqinnerillu
Siumup siulittaasuata nalunaarutaa namminiilivinnissamut aamma tamatuma qaqugu anguneqarnissaanut kiisalu partiimi aaqqissuusseqqinnermut inissaqartitsinermullu tunngavoq
Kim Kielsenip “Siumut siuttuuvoq”-mik qulequtaqarluni siulittaasup nalunaarutaa Sisimiuni Siumup ataatsimeersuarnissaanut aallartitanut 150-it sinneqartunut, aatsaallu taama amerlatigisunut saqqummiuppaa, namminiilivinnissaq sammillugu, Siumup tunngaviusumik pingaarnerpaatut suliassaatut aamma qanoq anguneqarnissaanik ukkataqartoq.
- Namminiilivinnissaq aamma tamatuma qanoq angunissaa Siumup tunngaviusumik suliassaasa pingaarnersarimmassuk anguniakkat ilaat tamarmik anguniagassartaqartarput, taamaattumik nutaanik naalakkersuisoqatigiinnik pilersitsigaangatta tamanna naalakkersuisoqatigiinnissamik isumaqatigiissutinut tamatigut ilannguttarsimavarput. Nunap iluata oqartussaaffigineqalernissaa anguneqassaaq, kisianni namminersortutut naalagaaffinngorutta aamma tunngaviusumik inatsisit naammassineqareerpata inaarutaasumik aalajangiiffigisassanngorlugu innuttaasunut taasissutigitinneqassaaq, Kim Kielsen oqarpoq.
Nammineq aningaasatigut isumaginninneq
Taassumunnga nunatta aningaasatigut imminut isumagisinnaanissaa pingaaruteqarpoq, taamaalilluni nunarput ullut ilaanni kiffaanngissuseqarluni arlaannaannuulluunniillu pituttorneqarani namminiilivissulersinnaanngorluni.
- Nunarsuarmiuteqatigiit kiffaanngissuseqartut ilagissavaatigut, tamatumani arlaannik aalajangiisoqassatillugu kikkulluunniit apereqqaartariaqarnatigit. Ilinniartitaanerit qaffassarneqassapput taamaattumillu ilinniartitaanerni suliassaqarfiit sukateriffigineqarnissaannut aaqqissuuteqqinneqarnissaannullu piffissanngorpoq. Taamatut inuusuttut sapinngisamik amerlanerpaat ilinniagaqalernissaannik imminut anguniagassissimagaanni taava meeqqat atuarfiannit anisut affaat ingerlaqqittanginnerat eqqortuusinnaanngilaq ingasappallaarlunilu. Taamaattumik ilinniartitaaneq tamaat ataatsimoortutut isigisariaqarparput aamma ingerlatinniarlugu ataqatigiissaakkamik suliniutit aallaavigalugit aaqqissuuteqqittariaqarparput.
Nunarsuarmi innuttaaqataasutut aamma ammaneq
Taassumunnga nunanut allanut ammasuunissaq aamma nunarsuarmi innuttaaqataasutut nunani tamalaani inuiaqatigiinni tamakkiisumik peqataanissamut periarfissat tamaasa atorluarneqarnissaat aamma pingaaruteqarpoq.
- Nunarujussuarmi innuttaasut ikittuinnaavugut, taamaattumik nunarsuarmioqataanissarput pisariaqartipparput. Minnerunngitsumik nunanut eqqaamiorisatsinnut pitsaasumik pissuseqarnissarput ikinngutigiittullu suleqatigiissinnaanerput pingaaruteqarpoq. Namminiilivissulernissatsinnut tunngatillugu pissutsit arlallit immikkut eqqumaffigisariaqarpavut aamma ajornartorsiutinik suugaluartunilluunniit naammattoorsisarumaarpugut tamakkulu immaqa nunat allat suleqatigalugit iluarsisinnaassavavut. Nunatta aningaasatigut imminut nammassinnaanissaa tamatumalu angunissaanut suleruloortariaqarnissarput qularutissaanngilaq aamma qinigaaffimmi matumani tamatuma tungaanut aallarumaartugut neriuppunga, Kim Kielsen, oqarpoq.
Qularneq
Taassuma namminiilivissulernissamut piariinngisaannartussaasugut aamma piffissami qaninnerusumi tamanna angunngisaannassagipput inuppassuit isumaqartussaasut oqaatiginikuuaa, kisianni Namminersulertussanngoratta aamma taamatut akunnattuungasoqarsimasoq, Kim Kielsenip pingaartillugu oqaatigaa.
- Nalornisunit unitsinneqarsimanngisaannarpugut anguniakkattalu tungaanut ingerlajuaannarsimalluta. Inuiaqatigiinni uatsitut ittuni tamatta peqataasariaqarpugut ineriartortitsinermullu tamatta tunniussaqarluta. Tamanna nammineq suliffigisamik paarsinikkut, pitsaasumik inuuneqarnikkut aamma inooriaatsikkut inuiaqatigiinnut ataqqinninnermik takutitsinikkut pissaaq.
Aaqqissuusseqqinnerit
Naalakkersuisut isertitanut akileraartarnermullu tunngasunik aaqqissuusseqqilerput, tamatumani innaallagissap erngullu akii assigiinnerulersinniarneqarput. Kim Kielsenip siulittaasutut nalunaarummini nunanit allanit isertitat amerlisinniarlugit nunanut allanut tuniniaanissamut tunngavinnik aaqqissuusseqqinnerit aallartinneqassasut oqaatigaa, taamaalilluni nunatsinnit toqqaannartumik nunanut allanut tuniniaasoqartalerluni aammali nunami suliffeqarnermi suliassaqarfimmi tamarmi aaqqiissuusseqqittoqartariaqartoq oqaatigalugu.
- Ukiut tamaasa atorfiit atorfinitsitsisarnerillu pillugit politikki oqaluuserileraangatsigu aamma tamatumani ajornartorsiutit allanngorsimanngitsut paasiuaannarivut soorunami arajutsineq ajorpakka. Taamaattumik 90-ikkut naalerneranni suliffeqarnermi aaqqissuusseqqinnerput kisiannili unitsinneqartoq sukumiisumik misissuiffigineqartariaqartoq aallarteqqinneqartariaqartorlu isumaqarpunga. Suliffeqarneq pillugu suliassaqarfimmik ataatsimoortumik isiginnittumik aaqqissuusseqqittariaqartugut isumaqarpunga, tamakku aamma suliffioreersunuinnaq tunngassanngillat aammali siunissami suliffissuaqarnikkut ineriartornerup tamatumalu malitsigisaanik sulisussanik pisariaqartitsinermi ilippanaatit ilanngunneqassapput kiisalu sulisartut akissarsiamikkut atugaat nutarterneqassapput, taamaalillutik nunani tamalaani akissarsianut naleqquttunngortillugit.
Inissaqartitsineq
Partimii assigiinngitsumik isumaqarnissamut isummertariaaseqarnissamullu tamatigut inissaqartitsisoqartarnissaa aammali assigiinngissutsit tamakku ataatsimoorfimmut pilliutigineqannginnissaat Kim Kielsenimut siulersuisuunernullu pingaaruteqarpoq.
- Inissaqartitsineq assigiinngitsunillu isumaqarnerit isummersortarnerillu Sisimiuni ataatsimoorfimmut akornutaassanngillat. Ukiorpassuarni taamaassimavoq aamma siunissami taamaassajunnarsivoq. Partiitsinni ukiuni makkunani suli nukittunerusariaqarlernissamut maattuninngortariaqarnissamullu immitsinnut anguniagassissasugut piumaffigivaatigut aamma tamanna ataatsimeersuarnermi sammissavarput, tassami sammisaq siunissami partiitsinni aaqqissuusseqqinnissamut ataatsimullu isigineqarnitsinnut ataqatigiimmata.
Naak siulersuisuunerit ilaanneeriarlutik taarserneqartaraluartut anguniagassaareersut aallaavigalugit partiimi suliassat suliariuaannarneqartartut tamannalu ilutigalugu sapinngisannguartik tamaat nunami tamarmi ilaasortat pitsaanerpaamik isumagisarsimagaat taamaalillutillu toqqissisimaneq pilersissimavaat, soorlu naalakkersuinermik sulinermi taamaattussaasoq Kim Kielsen isumaqarpoq.
Partii siuttuusoq
- Nunatsinni kingullermik qinersinermut sanilliussigutta taava 2014-imi qinersineq immaqa naalakkersuinermik suliaqarnermi ajornerpaamik pisimasuuvoq nalaatarput, taamaakkaluartoq qinersinermi ajugaavugut Naalakkersuisunilu aqutsisuulerluta. Aamma 2015-imi folketingimut qinersinermi taasisuvut amerlipput. Kiisalu ukioq´manna kommunalbestyrelsini nunaqarfinnilu aqutsisuni amerleriarpugut. Tassa piviusoq taamaappoq, naak allat minnerunngitsumillu tusagassiuutit ajorsartutut suaarutigigaluaraatigut. Piviusumilli silarsuaq allaavoq: Partiiuvugut siuttuusoq.