oqalugiaat
Kielsenip Kruse inissippaa
Qeqertarsuup Tunuani, Uummannami aamma Upernavimmi qaleralinniarnerup nalilersorneqaqqinnissaanik, Karl-Kristian Kruse akerleralugu Naalakkersuisut siulittaasuat Kim Kielsen isumaqarpoq. Taassuma aamma appat nungukkiartulersut iliuuseqarfigerusuppai.
Ullut marluinnaat matuma siorna aalisarnermut piniarnermut naalakkersuisup, Karl-Kristian Krusep, maanna qaleralittassiissutaasut nikisinneqannginnissaat attatiinnarpaa, naak ikileriarsimagaluartut aamma aalisapilunnermik pissuteqarpasikkaluartoq.
Aaqqiinissamut pisussaaffeqarneq
Kim Kielsenip ukiakkut ataatsimiinnermi ammaanersiornermi oqalugiarnermini qalerallit iliuuseqarfigerusunnerarpai:
- Qeqertarsuup Tunuani qaleralinniarneq ukiunut siuliinut naleqqiullugu kinguariartoq malunnarpoq. Tamanna pissutigalugu aalisagaqarfimmi tassani aqutsinerup allanngortinnissaanut Naalakkersuisuniit siunnersuusiussaagut. Aalisarnerup aalisagaqassutsillu taama annertutigisumik Qeqertarsuup Tunuani allannguuteqarnerata kingorna Naalakkersuisuni pisussaaffigaarput aalisartitsivimmi tassani aalisarnerlu ataatsimut isigalugu nutaamik aqutseriaaseqarnissamik isumaliuteqarnissatsinnut.
Naalakkersuisut siulittaasuat pinngortitamik nuannarisaqartoq aamma appaqassuseq ernummateqarfigaa. Pinngortitaleriffiup siornatigut eqqissisimatitsinissaq siunnersuutiginikuuaa, tamannalu piniarnermut aalisarnermullu naalakkersuisuusimasup, Hans Enoksenip iliuuseqarfiginikuunngilaa.
Appat pillugit pingaarutilimmik oqariartuut
- Biologit innersuussutaasa appallu amerlassusaannik kisitsisarnerit kingulliit tikkuuppaatigut appanik ikiliartuutaanngitsumik atuinerput sipporlugu atuilersimasugut. Paasissutissat taamaattut inuiaqatigiinni qarsupinnaveersaassavagut, arlaatigullu piniarnerup pitsaanerusumik aqunneqarnissaanik ersersitsisarmata. Tamanna pillugu Naalakkersuisuni nutaamik nalunaarusiulersaarpugut appat nunatsinniittut amerliartoqqilernissaannik siunertalimmik, tassuunakkut kingulissatta appanik nerisassaqartuarnissaat qulakkeersimaniarumallugu, Kim Kielsen oqalugiaammini oqarpoq.