eqqaaniut

Kielseni Ankeri pillugu: Siumumi ikinngutigilluakkatta qimappaatigut

Siumumi siulittaasup ministeriunerusimasoq Anker Jørgensen inuppalaartuunerapaa

Anker Jørgensen piffinni tamani tikilluaqqusaajuaannanngilaq. 1977-imi Qaqortumi akerliussutsimik takutitsisup manninnik milloorpaa

- Angut inuppalaartoq sulisartoqarnermik pingaartitsisoq Naalagaaffeqatigiinnermillu illersuisoq, kalaallit nunaannut ikinngutaalluartoq toqukkut qimaguppoq.

Siumumi aamma Naalakkersuisuni siulittaasup Kim Kielsenip socialdemokrateq ministeriunerusimasoq Anker Jørgensen, sapaatiummat 93-inik ukioqarluni toqusoq, eqqaaniutimini taamatut allaaseraa.

Ikunngitigiilluartut
- Siumumi ikinngutigilluakkatta qimappaatigut, Kim Kielsen erseqqissaavoq, saniatigulli aamma illuatungeriit assortuuteqatigiittarsimasut eqqaavaa.

– Naalagaaffeqatigiinnerup aqqani oqaluttuarisaanermi Anker tassaasimavoq nalornisitsinani ersarissumik isummertartoq, ilaannikkut nunatsinniit nuannarineqartuaannanngitsunik, soorlu taamanikkut nunatta pisuussutiminut piginnittuunissamik piumasaqarnera itigartikkamiuk oqarsimasoq ‘tamanna immeraatigineqarsinnaanngilaq’, Naalakkersuisut siulittaasuat allappoq.

Piffissaq pingaarutilik
Taassuma aamma tikkuarpaa, Anker Jørgensen piffissami Kalaallit Nunaata oqaluttuarisaanerani nutaajunerusumi pingaartorujussuarmut ministeriunerusimasoq.

– Anker nunatsinnut sunniutilerujussuarnik pingaaruteqarluinnartunillu aamma aalajangiisarsimavoq, soorlu 1973-imi Namminersornerulernissaq pillugu kommissionip kalaaliinnarnik ilaasortaqartup pilersinneqarnissaa akuersissutigigamiuk, aammalu kingusinnerusukkut 1975-imi kommissionip nutaap kalaallinik danskinillu amerlaqatigiinnik ilaasortaqartup pilersinnera taamaasilluni Namminersorneruneq 1979-imi pilersinneqartoq aqqutissiuullugu, Kim Kielsen erseqqissaavoq.

Atuaruk: Ministeriunerusimasoq Anker Jørgensen toquvoq

Powered by Labrador CMS