Kielsen qularnaatsumik siuttuuvoq
Siumup siuttuunini attatiinnarpaa, naalakkersuisoqatigiinnillu nutaanik isumaqatiginninniarnissat aallartissinnaanngorpai. Demokraatit siuariarujussuarput.
Partiit angisuut, IA aamma Siumut, qinersinerup unnuaa naallugu partiini annersanngorniupput. Akerleriinnerminni imminnut angusaqattaarput. 2014-imi qinersinermut sanilliullugu kikkut taaguunneqanerpaanissaannut tassani unammisoqanngilaq. Kisianni partiip taasinernik annaasaqannginneqqusaapput.
Taasinerit 526-t assigiinngissutaasut
Tassami Nunatsinni partiit annersaat Inatsisartunut qinersinermut sanilliullugu malunnaatilimmik kinguariarput. Kisianni siulia assigalugu Sara Olsvigip aamma Kim Kielsenip akornanni ajugaaniunnermi Siumut ajugaavoq. Taasinerit 526-t partiit taakku nikingassutigaat. Kingullermik taasinerit 326-t assigiinngissutaapput. IA 11-nik ilaasortaatitaqareerluni arfineq-pingasunik ilaasortaatitaqalerpoq, Siumut 11-nit qulingiluanut kinguariarluni.
Kim Kielsenip maanna naalakkersuisoqatigiit nutaat isumaqatiginninniarfiginissaata aallartissinnaanngornerinik, qinersinerupinernerata kinguneraa. Tamangajammik toqqagassaapput. Partiit amerlanerpaat Siumut siuttoralugu Kielsen naalakkersuisoqatigereerpaat. Tassani Atassut, Demokraatit, IA aamma Partii Naleraq pineqarput. Ulluni tulliuttuni politikkikkut katiterunnissamut tunngatillugu, allatut oqaatigalugu Kim Kielsen iluaqutaasumik inissisimavoq.
Naalakkersuisoqatigiinnissamut periarfissat arlaqarput, taannalu partiini siuttunut ataasiakkaanut ilisarisimannilluarpoq. Kisianni aamma akimmiffeqarpoq. Aalisarnermut inatsit aamma uranimik piiaaneq niaqorluutit ilagaat, taamatullu aamma Demokraatit pinngitsooratik akileraarutinik appaanissamik piumasaqarput. Kisianni tamanut ammasumik oqaatiginnittarneq allaavoq. Isumaqatiginninniarfiusumilu aamma oqaatigineqartut allaasarlutik.
Tupaallannartut arlallit
Qinersineq arlalitsigut tupaallannartoqarpoq. Partii Naleraq aamma Nunatta Qitornai, piaartumik Danmarkimit avissaarnissamik kissaateqartut nukittoriarput. Partii Naleraq pingasunik ilaasortaatitaqarnermit sisamanik ilaasortaatitaqalerpoq, Vittus Qujaukitsup Nunatta Qitornai sinnerlugit ilaasortaassaaq. Siumumi siulittaasuusimasoq taaguunneqarluartartoq, Aleqa Hammond, Nunatta Qitornai sinnerlugit sassartoq, taaguunneqarpallaannginnera ingammik takuminarpoq.
Qinersisartunik isumasiuinermi ilimagineqartutut Demokraatit qinersinermi angusarissaarnertik nuannaarutigisinnaavaat. Partii Inatsisartuni annersaasut pingajuat – procentinik arfineq-pingasungajannik siuariarpoq, tassa sisamanik ilaasortaatitaqarnermit arfinilinnik ilaasortaatitaqalernermut. Partiimi Niels Thomsen taaguunneqarnerpaavoq, taanna 2554-nit taaguunneqarpoq – Kim Kielsenimit amerlanernit taaguunneqarluni – partiimilu siulitaasoq Randi Vestergaard Evaldsen 519-nit taaguunneqarpoq.
Anorersuaq anigoraat
Naak partii ukiuni kingullerni Siumumut nuuttunik ilaasortaajunnaartartunit nalaataqartaraluarluni, siornatigut pissaaneqartoq ataqqineqartorlu Atassut anorersuarmik aniguivoq. Partiimi siulittaasup Siverth K. Heilmannip aamma Aqqalu Jerimiassenip Inatsisartunut ilaasortanngortinnissaatiluatsinneqarpoq.
Naggataatigullu naalagaaffeqatigiinnermik illersuisut Suleqatigiissitsisut Tillie Martinussen Inatsisartunut ilaasortaatitarilerpaat.