NunaMinerals
Kielsen Nunaminerals pillugu: Pilersaarut ingerlariaqqinnissamut pilersaarutaanngilaq
Naalakkersuisut siulittaasuata Nunamineralsip pisortaa maanna akivaa. Pilersaarut, 4,5 millioner koruuninik atukkiineq qaammammik sioqqullugu tunniunneqartoq, Naalakkersuisut atukkiinerminni piumasaqaataanut tunnganngilaq, Kim Kielsen akissuteqarpoq
Nunamineralsip inissisimanera pillugu Namminersorlutik Oqartussat naammattumik akulerutsinneqannginnerarlugit sakkortuumik Naalakkersuisut siulittaasuannit, Siumumeersumit Kim Kielsenimit, uparuarneqareerlutik Nunamineralsip pisortaanera pingasunngornermi akissuteqarpoq aatsitassarsiorfik siornali oktobarimi piffissamut 2015-imiit 2017-imut pilersaarummik suliffeqarfimmi piginneqatigiissutinik pigisaqartup annerpaartaanut tunniussereersimasoq.
Pilersaarut, Ole Christiansenip oqarneratut, imaqarpoq Nunamineralsip ukiuni 2015-imiit 2017-imut pilersaarutaanik, soorlu aamma ukiuni taakkunani suliffeqarfiup aningaasat pisariaqartitai nalunaarsorneqarsimasut.
Atuaruk: Nunaminerals sakkortuumik uparuarneqareerluni akivoq
Atuaruk: Naalakkersuisut: Nunamineralsimut aningaasaliissutigineqarsimasut tamarmik annaaneqareerput
Suliffeqarfik sukumiisumik pilersaarummik tunniusseqquneqarpoq
Kisiannili maanna Naalakkersuisut siulittaasuat, Siumumeersoq Kim Kielsen, akissuteqarpoq erseqqissaatigalugu pilersaarut tassaanngimmat, pilersaarut siorna novembarip 27-anni taarsigassarsititsinermut atatillugu Naalakkersuisunit piumasarineqartoq – ingerlatsinissamut pilersaarutip saqqummiunneqarneranit qaammat sinnerlugu qaangiuttoq.
- Nunamineralsip 4,5 million koruuninik Namminersornerullutik Oqartussanit taarsigassarsinermut atatillugu piumasaqaatit nammineq atsiorpai. Piumasaqaatini erseqqissumik allassimavoq selskabi ingerlariaqqinnissamut nutaamik piviusorsiortumik pilersaarusioqqissaassasoq, Kim Kielsen allappoq, nangillunilu:
Naalakkersuisut ingerlariaqqinnissamut pilersaaruteqarnissamik aningaasaqarnikkullu missingiusiornissamik piumasaqaataannik NunaMinerals naammassinnissinnaasimanngilaq. Ingerlatsinissamut pilersaarut Naalakkersuisut piumasaannut annaassinissamik pilersaarutaanerassallugu kukkuneruvoq.
Atuaruk: Akuersissut tunniunneqarpoq suliffeqarfiup matuneqarnissaa aarlerineqarmat
Atuaruk: Nunamineralsip aatsitassarsiornermut akuersissutaatini tunniukkaa
Ualimut ataatsimeersuarneq aallartissaaq
Naalakkersuisut siulittaasuat Kim Kielsen Nunaminerals pillugu immikkut ataatsimeersuarnissaq sioqqullugu oqaaseqarusunngilaq.
Nunamineralsimi immikkut ataatsimeersuarneq Nuummi Hotel Hans Egedemi sisamanngornermi nalunaaqutaq 16.00 aallartissaaq.
Namminersorlutik Oqartussat amerlanerpaanik, tassa 33,41 procentinik, Nunamineralsimi piginneqatiginnissutinik pigisaqarput. Piginneqatiginnissutinik amerlanerpaanik pigisaqartut aappaat tassaapput Lønmodtagernes Dyrtidsfond aamma Nykredit Bank, taakkua piginneqatiginnissutit 16,89 procentiinik aamma 9,71 procentiinik pigisaqarmata.
Piginneqataasuaqqat 3.000-t allat, amerlasuut nunatsinni najugallit, piginneqatiginnissutit sinneri, tassa 40 procentit pigaat.
Atuaruk: Kim Kielsen: Nunamineralsimik naakkittaatsumik tigusiniartoqanngilaq
Atuaruk: Nunaminerals nakkaattuulerpoq
Nunamineralsi pillugu allaaserisat allat uani atuakkit