Kielsen Lars-Emilimit qoqassineqartutut misigivoq

Siumup iluani pissaaneqarniunneq sakkortusiartorpoq. Immikkuullarissumik Sermitsiami ullumi saqqummersumi tamanna erserpoq. Tassani Lars-Emil Johansen isertuarani Kim Kielsenimut saassussivoq isornartorsiuinerullu saqqummiunneqarfiani aviisimi Kim Kielsen akissuteqarnissamut periarfissinneqarsimanngilaq.

Aamma atuaruk: Lars-Emil Johansenip Kim Kielsen isornartorsiorpaa

Maannali taama pineqarpoq.

Naatsumik oqaatigalugu Lars-Emil Johansenip partiimi siulittaasuni isornartorsiorpaa suliani annertuuni Siumut sanngiitsutut saqqummiussimanerarlugu. Assersuutitut taavai mittarfiliornissat, Nuup illoqarfiata ilassutissaa Siorarsiorfik aammalu aatsitassarsiorniarluni suliniutit nukinngunneqarnerusariaqartut isumaqarami.

Kisianni Kim Kielsenip naliliinera malillugu Lars-Emil Johansenip isornartorsiuinera tunngavissaqanngilaq inuttarsiuinermullu tunngasuunerarlugu.

Pissaaneqarniunneq avissaartuunnerlu nutaaq
- Pineqartoq tassaavoq Inatsisartuni gruppetsinni nungullarsaataasumik avissartuunnermi kapitali nutaaq pissaaneqarniunnerlu piffissami sivitsortumi Lars-Emil Johansenip siuttuuffisgisaa aammalu kikkunnit tamanit malugineqarsinnaalereersoq, Kim Kielsen oqarpoq nangillunilu:

- Ajoraluartumik takusinnaavarput ilutsinni avissartuunneq akornitsinnilu nipip atorneqartup ilungersunarsigaluttuinnarnera. Ajoraluartumik takusinnaavarput inuiaqatigiit politikkikkullu suleqatitta ilanngutsinniarneqarnerat tunuarsimaarfigineqanngitsoq, Kim Kielsen oqarpoq.

Tatiginninneq nukillaasarpaa
Kim Kielsenip erseqqissarpaa Siumukkormiut iluminni assigiinngitsunik isummersorsinnaanerat ataqqillugu taamaattoqartuaannarsimammat. Taamaattoq kaammattuutigaa oqallinnerup ileqqorissaartumik ingerlanneqarnissaa.

- Politikkerit suliniaqatigiiffilerisullu akornanni pissuseq atugara tassaavoq demokrati atorlugu aalajangiinerit ataqqisaralugit ilutsinni oqallinnermi ajugaasimagutta ajorsarsimaguttaluunniit. Taamaattumik nakeriallaatigaara partiima iluani, Lars-Emil siuttoralugu nuna tamakkerlugu ataatsimeersuarnermi, siulersuisuunerni, Inatsisartuni gruppemi Naalakkersuisunilu aalajangernerit ataqqinneqanngippallaarnerat, Kim Kielsen oqarpoq.

Akisussaaffeqarfiit
Ilaatigut taanna isornartorsiorneqarpoq naalakkersuisooqatigiit nutaat pilersinneqarmata akisussaafiit soorlu isumaginninnermut tunngasut aalisarnerullu Inuit Ataqatigiinnut Partii Naleqqamullu isumagisassanngortinneqarsimanerat. Taamaasilluni partiit naalakkersuisooqataasut aamma saassuppai akisussaaffinnik taakkuninnga pissarsisariaqarsorinnginnamigit.

- Suliat tamarmik demokrati atorlugu suliarineqarsimapput. Kisimiillunga tamakku aalajangingarinngilakka. Naalakkersuisunngortitsiniarnermi partiip qullersai akuutinneqarput naalakkersuisunngortullu Inatsisartuni atituumik taperserneqarlutik. Isumaqatigiissut taanna akerlerigaanni taamanili akerliulluni nalunaartoqarsimasussaagaluarpoq, Kim Kielsen oqarpoq aammalu Naalakkersuisut katititaanerisa isornartorsiorneqarneratigut naalakkersuisooqataasunit Siumup isigineqarnera innarlerneqartoq.

Sulinerup sukkassusaa
Mittarfiliortiternerit aatsitassarsiornermilu suliniutit pillugit Lars-Emil Johansenip isornartorsiuineranut naatsuinnarmik akissutissaqarpoq.

- Avataaniit aningaasaliisussarsiorsinnaanngilagut suliniutit assigiinngitsut sukumiisumik teknikkikkut nassuiarneqarsimatinnagit. Aatsitassarsiornermut atatillugu oqartariaqarpunga aatsitassanut Inatsisartut inatsisaat nunarsuarmi sakkortunerpaat ilagimmassuk Inatsisartunit isumaqatigiissunit akuerisaasoq. Pinngortitarsuarput mianernartoq pilliutigisinnaanngilarput aningaasarsiupallanniaannarluta, Kim Kielsen oqarpoq.

Pissaaneqarniunneq
Apersorneqarnermini arlaleriarluni uterfigisarpaa Lars-Emil Johansen pissaaneqarniukkusunnerarlugu partiip unammilligassai tigussaasumik isummersorfiginagit.

- Taamaattumik Lars-Emil Johansen kajumissaarusuppara aqqutigisatsinnut uteqqullugu uagut allat Siumup politikkia suleqateqarneralu aalajaalluta peqataaffigigatsigu. Pingaaruteqarpoq politikki ingerlatarput demokratilu atorlugu aalajangersakkatta ataatsimoorfiginissaat, Kim Kielsen oqarpoq isertuanngilaalu ileqqorissaarluni tusagassiornissami malitassat Sermitsiap saqqummiussinermini sanioqqussimammagit suliaq illuinnaaniit saqqummiullugu.