Inatsisartut
Kielsen: Innuttaasut Nunatsinnik kivitseqataassapput
Naalakkersuisut siulittaasuata kajumissutsiminnik sulisut qanoq angusaqarsinnaanerat pillugu Arctic Winter Games assersuutitut atorpaa
Arctic Winter Games aamma SIK-p ukiunik 60-inngortorsiorluni nalliuttorsiornera, ukioq manna pisut annertuuginnaanngillat.
Piumassutsiminnik ikiuullutik suleqataasut Nunatsinni qanoq angusaqarsinnaanerannut pisut assersuutaapput.
Naalakkersuisut siulittaasuata Kim Kielsenip, Inatsisartut tallimanngornermi suliartornerannut atatillugu ataatsimiinneq nutaaq aallartimmat ammaanersiorluni oqalugiarnermini tamanna naqissuserpaa.
Assit takukkit: Inatsisartut ingerlaaqatigiittut
Annertuumik allannguisut
- Piumassuseqarneq tamanna peqatigiiffippassuarnit inunnillu ataasiakkaanit ullut tamaasa ukioq kaajallallugu ingerlanneqartoq inuiaqatigiinnut innuttaasunullu iluaqutaavoq. Nunatsinni isumaginninnikkut ajornartorsiutinik, suliffissaaleqinermik ningaasarsiornikkullu unammilligassanik naapitassaqartilluta, suliniutit tamarluinnarmik sunniuteqarput.
- Ulluinnarni ajornartorsiutit unammilligassallu naapitassaajuaraluartut inuiaqatigiit ingerlaannarnissaannut suliassanik tigusiumasunik inuppassuaqarmat tulluusimaarutigalugulu nuannaarutissarivarput, Kim Kielsen oqarpoq.
Atuaruk: Kielsen malunniuteqarnerusariaqarputit
Suleqatigiinnerulerneq
Tassunga atatillugu qanimut suleqatigiinnerunissamik pisariaqartitsisoqartoq. Innuttaasut inuiaqatigiinnut, tamatta akuuffigisatsinnut, pilersueqataasinnaassussiat atorluarneqassapput.
- Inuiaqatigiinni atugarissaarnermik nunamilu siuariartortumi innuttaasut, peqatigiiffiit, kattuffiit, inuiaqatigiinni suliniaqatigiiffiit allat politikerillu pisariaqartinneqarput. Tamatta assigiinngitsunik isummertaaseqaraluarluta, soqutigisaqaraluarluta anguniagaqaraluarlutalu nunatsinni pitsaanerusumik atugaqarnissarput anguniarlugu suleqatigiittariaqarpugut, Naalakkersuisut siulittaasuat erseqqissaavoq.
Iliuusissat arlaqartut
Ammaalluni oqalugiarneq aamma Naalakkersuisut ataatsimiinnermi saqqummiussaannut ersarissumik oqaaseqaatinik imaqarpoq. Oqalugiaat tamarmi allaaserisap talerpiani aaneqarsinnaavoq.
Atuaruk: Ukiaanerani ataatsimiinnermi IA-mit siunnersuutit 28-t