Kielsen: Eqqartuussissuserisut misissuinerat taamaammat kinguartinneqarpoq

Pituffimmi suliarinnittuussinissamut misissuinissamut tunngatillugu kinguartitsisoqarpoq.

Tamanna Naalakkersuisut siulittaasuata Kim Kielsenip ilisimatitsissutigaa. Misissuineq apriilip aallaqqaataanit ingerlanneqalersimasussaagaluartoq taamaasilluni kinguartinneqarpoq.

Kinguartitsinermut eqqartuussissuserisoq Ole Spiermann pissutaavoq.

Inuit Ataqatigiinnit Sara Olsvigip paragraf 37 naapertorlugu apeqquteqareersoq Kim Kielsenip tamanna ilisimatitsissutigaa.

- llisimatitsissutigissavara eqqartuussissuserisut misissuinerat suliakkiissut malillugu ulloq 1. april 2015 naammassineqartussaagaluarmat. Misissuinerli kinguaattoorsimavoq. Kinguaattoorneq pissuteqarpoq eqqartuussissuserisoq Ole Spiermann eqqartuussissuserisunut ileqquusut pillugit maleruaqqusat malillugit misissuinermik aallartinneqareersumik isumaginnissinnaanngitsutut nalilerneqarmat. Eqqartuussissuserisut misissuinissaannut suliamut attuumassuteqartut tamarmik tatiginninnissamik soqutiginninnerat aallaavigalugu apeqquserneqarpoq Ole Spiermann eqqartuussissuserisunut ileqquusut pillugit maleruaqqusat malillugit misissuinerup aalajangiiffigineqarnissaanut piukkunnaateqarnersoq, tassa misissuinermik aalajangiineq Advokatrådets Responsumudvalgimut, Advokatnævnimik taaneqartartumut saqqummiussinissamut. Eqqartuussissuserisut Allattoqarfiata ilisimatitsissutigaa suliaq apriilip qaammataata ingerlanerani suliarineqassasoq naatsorsuutigalugu, Kim Kielsen nassuiaavoq.

Juunimi naammassisinnaasoq
Nangipporlu:

- Tamanna tunngavigalugu eqqartuussissuserisut misissuinissaat unitsikkallarneqarpoq. Advokatrådets Responsumudvalgip Bruun & Hjejle aamma Namminersorlutik Oqartussat taperserpagit misissuineq piaartumik aallarteqqinneqassaaq, naatsorsuutigineqarlunilu 2015-imi juunip qaammataani naammassineqassasoq.

Naalakkersuisut misissuititsinerup inernera innuttaasunut Inatsisartunullu Inatsisartut martsip 19-ni 201S-imi ataatsimoorlutik avammut oqaaseqaatiminni sakkortuumik inassutigisaattut saqqummiunniarneraat Sara Olsvig aamma apeqquteqarpoq.

Naalakkersuisut siulittaasuat ima akissuteqarpoq:

- Paragraf 37 naapertorlugu apeqqummut nr. 52-imut akissutinni ilisimatitsinittut itigartinngilara misissuinermut suliakkiissutip taassumalu inernerata imaluunniit inernerata ilaanik Inatsisartunut imaluunniit tamanut kingusinnerusukkut saqqummiunneqarsinnaanera.

- Tamanut saqqummiussinermi paasissutissat ilaannik isertuussisoqartussaanersoq pillugu isummertoqarumaarpoq. Aamma nunanut allanut sillimaniarnikkullu politikkeqarneq pillugu eqqarsaatit, nunanullu allanut pissaaneqartunut pissutsit pingaaruteqalersinnaapput, soorlu aamma nalinginnaasumik nipangiussisussaatitaaneq matumani pineqartoq eqqarsaatigalugu.

Pituffik pillugu misissuisitsineq sumulluunniit attuumassuteqanngitsuusoq Kim Kielsenip IA-mut arlaleriarluni erseqqissaatigisareerpaa.