Pituffik
Kielsen: Eqqartuussissuserisup misissuinera arlaannaannulluunniit attuumassuteqanngilaq
Pituffimmut suliamut tunngatillugu eqqartuussissuserisup misissuinera suugaluartorluunniit arlaannaannulluunniit attuumassuteqanngitsuusoq Naalakkersuisut siulittaasuata Kim Kielsenip Inuit Ataqatigiinnut oqaatigaa
- Naalakkersuisut eqqartuussissuserisumik misissuisussamik inniminniisimanerat, sumulluunniit attuumassuteqanngitsuunerat naammanngilaq.
Inuit Ataqatigiinni siulittaasoq Inatsisartunilu ilaasortaq Sara Olsvig arlaleriarluni oqartareerpoq.
Sermitsiaq.AG-mit februaarip 27-ani apersorneqarami aamma taamatut oqarpoq.
Oqaaseq 'arlaannaannulluunniit attuumassuteqanngitsoq' Naalakkersuisut qanoq
paasineraat pillugu paragraf 37 naapertorlugu isornartunik apeqquteqaanni Naalakkersuisut siulittaasuanit Kim Kielsenimit Siumumeersumit akineqaqqammerpoq. Aperaaq ima paasineqassanersoq tassa inatsisilerituunit misissuisitsineq immini 'arlaannaannulluunniit attuumassuteqanngitsutut' paasineqassasoq, tassa inatsisileritooq pineqartoq Namminersorlutik Oqartussani atorfeqanngimmat.
Apeqqummut Kim Kielsen ima akissuteqarpoq:
- Isumaqanngilanga eqqartuussissuserisup misissuinera suugaluartorluunniit arlaannaannulluunniit attuumassuteqanngitsuusoq. Suliami matumani pineqartumi misissuinerup arlaannaannulluunniit attuumassuteqannginneranik oqarnermi pineqartoq tassaavoq suliaq eqqartuussissuserisumut avataaneersumut tunniunneqarsimammat, taassumalu inuit kikkuugaluartulluunniit attuumassuteqartut oqaloqatiginiarlugit aggersarsinnaavai, taassumattaarlu nammineerluni aalajangertussaavaa inuit allagaatinut suliamullu tunngassutilinnut misissuinermut pingaaruteqarsinnaasunut isersinnaasut sorliit aggersarsinnaanerlugit.
Kim Kielsen: Ole Spiermann sumulluunniit attuumassuteqanngilaq
- Aamma isumaqarpunga eqqartuussissuserisoq toqqarneqartoq Namminersorlutik Oqartussanik sullissisarnermini imatut attuumassuteqartiginngitsoq misissuineq arlaannaannulluunniit attuumassuteqanngitsutut isigineqarsinnaanani, Kim Kielsen akissuteqarpoq.
Pituffimmi sakkutooqarfimmi kiffartuussinissamut isumaqatigiissutissamik neqerooruteqartoqarnissaata tungaanut Kalaallit Nunaanni qanoq pisoqarsimanersoq ilisarisimasatoqqap Ole Spiermannip Københavnimi Bruun og Hjejle-meersoq misissuisuussaaq, tamanna AG-mi pingasunngormat allaaserineqarpoq.
Tamanna allakkiami AG-mit pissarsiarineqartumi takuneqarsinnaavoq, allakkiami tassani eqqartuussissuserisup misissuinissaanut suliassat tamarmik allaaserineqarsimapput.
Suliami misissuisussaq kinaanersoq aviisimi AG-mi pingasunngornermi saqqummersumi atuarneqarsinnaavoq. Suliami suut misissorneqartussaanersut pillugit aamma atuarneqarsinnaavoq, kiisalu suliaq sooq isertuunneqartussaatitaanersoq aamma atuarneqarsinnaalluni. Aviisi uani pisiariuk: