Ammaanersiornermi oqalugiaat

Kielsen: Aaqqissuusseqqinnerit artornartut atussavavut

Naalakkersuisut siulittaasuata ammaanersiornermi oqalugiarnermini erseqqissarpaa amigartoorutit qaangerniarnissaannut allatut ajornartumik aningaasaqarnermut politikkimik sakkortuumik ingerlatsisoqartariaqartoq

Kim Kielsen ammaanersiornermi oqalugiarngaarpoq

– Sullissinermi nalinginnaasumik pitsanngorsaanissatsinnut akissaqanngilagut, sammisaqarfippassuarni pivisumik pisariaqartumillu pisariaqartinneqartut amerlagaluaqisut. Taamaattumik Inatsisartut Naalakkersuisullu ataatsimoorlutik suliassaraat ajornakusoortunik tulleriissaanissaq toqqaanissarlu.

Tunioraasoqassanngilaq

Taamatut oqaaseqarluni Naalakkersuisut siulittaasuata Kim Kielsenip erseqqissaatigaa innuttaasut - imaluunniit naalakkersuisooqatigiit politikkikkut tununiaqutaasa - naatsorsuutigissanngikkaat 2016-imut aningaasanut inatsimmi aningaasartuutissanut nutaanut angisuunut akissaqartitsisoqarnissaa naatsorsuutigissanngikkaat. Taarsiullugu tamatta nassuerutigisariaqarparput sipaartariaqartugut tulleriiaarisariaqarlutalu, ukiumiit ukiumut landskarsip amigartooruteqartarnissarujussua pakkersimaarniarlugu.

Kim Kielsenip oqaatigaa sipaarfiusariaqartut ilagigaat Namminersorlutik Oqartussat ingerlanneqarnerat tassanilu allaffissorneq.

Taamatut oqariartuuteqarpoq Inatsisartut ukiakkut ataatsimiinnerisa ammarnersiorneqarnerani oqalugiarnermini.

Oqimaaqatigiissitsineq

– 2016-imi 2017-imilu aningaasanut inatsisikkut amigartoorutissat amerlineqassanngillat, sulilu qulakkeerniarneqassaaq qinigaaffimmi matumani aningaasanut inatsisip oqimaaqatigiissinneqarnissaa, Kim Kielsen erseqqissaavoq, ilanngullugulu erseqqissarlugu aningaasatigut aaqqissuusseqqinnissat, Naalakkersuisut saqqummiussassaat, innuttaasunut naapertuuttuussasoq.

– Aaqqissuusseqqinnissanut siunnersuutinik saqqummiussissaagut inuiaqatigiinni nammaqatigiinnermik sakkortusisitsisumik aammalu tulleriiaarinissamut aningaasaliissuteqarnissamullu aningaasatigut periarfissiisumik. Inatsisussanut aalajangiinissanullu saqqummiussaqassaagut aningaasaqarnermik, siuariartornbermik suliassaqartitsinermillu pitsanngorsaataasussanik. Minnerunngitsumillu aningaasanut inatsisissatut siunnersuumik saqqummiussissaagut, siuariartornermut attaveqarnermullu pingaarnerutitsisumik, inuussutissarsiornerup ineriartornissaanut innuttaasunillu sullissinitta pitsaanerulernissaanut iluaqutaasumik, Kim Kielsen oqarpoq.

Amerlanerussuteqarluarluni

Tamatuma saniatigut Naalakkersuisut siulittaasuata neriuutigaa aningaasanut inatsisissaq, aaqqissuusseqqinnissanik imalik, Inarsiartut tamarmiullutik tapersersorumaaraat.

– Naalakkersuisut neriuutigaat naatsorsuutigalugulu aningaasanut inatsimmut isumaqatigiissutissami Inatsisartuni partiit tamarmik nunap unammilligassaanik suliniarnermi akisussaassuseqataarusussasut. Isumaqatigiinniarnerni Naalakkersuisut isumaqatigiissuteqarniarnerni siammasissumik isumaqatigiissuteqarnissaq, aningaasaqarnerup oqimaaqatigiinnissaanik akisussaassuseqarnermik tunngavilik, aalajangiusimaniarpaat. Taamaattumillu nutaanik akitsuusiiniarnerit imaluunniit isertitat ikileriarnissaat allatigut aningaasaliissuteqarnikkut matussutissinneqassapput, Kim Kielsen oqarpoq.

Powered by Labrador CMS