qinersineq

Kielsen aamma Olsvig qinersinissamut piareerput

Sapinngisatik tamaasa atorlugit qineqqusaartareerput oqaatiginiakkatillu amerlanerit oqaatigereerlugit. Qinersisoqarnissaa tullinnguuppoq

Kina Naalakkersuisunut siulittaasuulissava? Inuit Ataqatigiit siulittaasuat Sara Olsvig imaluunniit Siumut siulittaasuat Kim Kielsen?

Naalakkersuisunut siulittaasunngornissaannut ilimagineqarnerpaatKim Kielsen Siumut aamma Sara Olsvig Inuit Ataqatigiit, qaammatini marlunni qineqqusaartareeput. Illoqarfinni assigiinngitsuni qineqqusaartareeput.

- Angalasupilussuusareerpunga, oqitsuinnaanngilaq, illoqarfinnili tikitanni tamani inuit inussiarnerrateqaat. Tikitanni tamani toqqissillunga qineqqusaarpunga, Inuit Ataqatigiit siulittaasuat Sara Olsvig oqarpoq.

Siumumi nukitik tamaasa atorlugit qineqqusaarput.

- Sapinngisarput tamaat atorlugu qineqqusaarpugut. Namminneq kajumissusertik atorlugu qineqqusaarnitsinni suliaqartut qujassutissaqarfigeqaakka. Ulloq qinersiviusoq piareerfigaarput, Kim Kielsen Sermitsiaq.AG-mut oqarpoq.

Piareerput
Inuit Ataqatigiit ulloq qinersiviusoq qilanaaraat.

- Piareersimavunga aamma ulloq qilanaaraara, Sara Olsvig oqarpoq.

- Inuit Ataqatigiit tatiginarlutik qineqqusaarput. Ataqatigiilluarpugut, aamma Kalaallit Nunaata aningaasaqarnera ilorraap tungaanut aallartinnissaanut piareersimavugut. Akisussaassusilimmik politikkeqarluta Kalaallit Nunaata tamaat siuariartinnissaanut piareersimavugut, Sara Olsvig oqarpoq.

- Qineqqusaarneq soorunami imaannaanngitsuuvoq. Siunissamili suliassaasunit siuttuunissamut piumassuseqarpunga, Sara Olsvig oqarpoq.

Qineqqusaarneq sakkortusimanngitsoq Kim Kielsen oqarpoq.

- Innuttaasut pitsaanerusumik atugaqalernissaat pillugu qineqqusaarneq sakkortunngisaannarpoq, Kim Kielsen oqarpoq.

Powered by Labrador CMS