uuttortaatit
Kiassarnermut imermullu kissartumut uuttortaatinut 50 millionit koruunit
Kisianni attartortut ima sipaarfiusinnaatigipput allaat ataatsimut isigalugu inissiat immikkut tamaasa kiassarnermut uuttortaasersoraanni iluanaaruteqartoqarsinnaalluarluni.
Maannakkut asulersuaq kiassarneq nalinginnarmillu kissamik atuinerit unitsinneqassapput.
Aviisi AG taama allappoq.
Ukiaanerani ataatsimiinnermi septembarip 22-anni aallartittussami inatsisissatut siunnersuut siunissami inissiat 1.000-ilippassuit tamarmik immikkut kiassarnermik uuttortaateqalernissaannut aqqutissiuussisussaq Naalakkersuisut saqqummiutissavaat.
Tamanna siunissami ungasinnerusumi attartortut ataasiakkaat kiassarnermut aningaasartuutaanik amerlasoorpassuarnik sipaarfiusinnaasoq naatsorsuutigineqarpoq; 40 procentit angullugit.
Kajumissaaneq
Nunanimi allani attartortut sanilimik kissamik atornerluinerannik akiliisussaajunnaaraangamik kissamik sipaarnissaminnut kajumissuseqalersartut misilittakkat takutippaat.
Sipaaruteqarnissamut ilippanaatit nalunaarusiami Rambøllikkunnit suliarineqartumi inatsisissatut siunnersuutip tunngavigilluinnarpai. Aamma inissiat aallaqqaammut tamarmik immikkut kiassarnermik uuttortaaserneqartussat 3.000-ingajaat toqqarneqarput.
Inissiat 3.000-ingajaat
- Inissiat taakku 2.979-iusut tamarmik qitiusumit kiassarneqarlutillu imeqartut teknik eqqarsaatigalugu kiassarnermik uuttortaaserneqarnissaminnut piareersimasut pineqartut inatsisissatut siunnersuummi allassimavoq.
Kiassarnermut uuttortaatit tamarmik ikkussuunneqarnissaat qanoq akeqassanersoq Rambøllimit nalunaarusiami aamma naatsorsorsimavaat, tamannalu attartortunut soqutiginnaateqarpoq, tamakkuuppummi naggataatigut akiliisussat. Akikitsuinnaanngillallu!
- Kiassarnermut imermullu atukkamut kiassakkamut atuinernut uuttortaatinik inissiani taakkunani 2.979-iusuni tamani, qitiusumik kiassagaallutillu imeqartinneqartunut, ikkussuinernut aningaasartuutit 50 millionit koruuninut naatsorsorneqarsimasut inatsisissatut siunnersuut pillugu nassuiaatini erseqqissaatigineqarpoq.
Allaaserisaq tamaat aviisimi AG-mi atuaruk, taanna uani digitaliusumik atuarsinnaalersinnaavat: