Kalaallit Illuutaat
Kbh-mi oqallinneq: Inuusuttut isaannit nunatta siunissaa
Kalaallit Nunaata siunissaa qanoq eqqarsaatigineqarnersoq pillugu oqallisissapput IA Københavnimi siulittaasoq, ilinniartut peqatigiiffianni Avalammi siulittaasoq kiisalu ph.d-nngorniaq
Nunatta siunissaa qanoq eqqarsaatigineqarnersoq pillugu oqallinnissaq Københavnimi Kalaallit Illuutaanni marlunngornermi marsip 25-anni ingerlanneqassaaq.
- Kalaallit Nunaata siunissaa qanoq isikkoqarnersoq inuusuttut angusaqarluarusuttut oqallinnermi ilaatigut aperineqassapput. Uulia aatsitassarsiornerlu nunatta nappatigissavaat, namminiilivinnissaq naalagaaffeqatigiinnermulluunniit akuuginnarnissaq, immaqaluunniit allaanerusumik iliortoqartariaqarpa? Kalaallit inuusuttut nunatta siunissaanut qanoq takorluugaqarnermikkut oqallinneranni peqataagit, oqallittoqarnissaanut qilanaartuummi nalunaarutigineqarpoq.
Oqallittussat tassaapput:
- Eskimologisut ilinniagaqartoq IA Københavnimilu siulittaasoq Ortu Mørch Olsen
- Ilinniartut peqatigiiffianni Avalammi siulittaasoq Hans Peder Kirkegaard
- Ph.d-isut atuartoq aviisimilu Ingeniørenimi bloggertartoq Aviaja Lyberth Hauptmann
Kalaallit Nunaata siunissami unammillernartui pillugit aviisimi Informationenimi tusagassiutoq Emil Rotbøll oqallinnerup aallartinnginnerani saqqummeeqqaassaaq, oqallinnermilu aqutsisuussalluni.
Kalaallit Illuutaanni Københavnimi Løvstræde-miittumi oqallinneq ingerlanneqassaaq nalunaaqutaq 17.00-imiit 19.00-ip missaata tungaanut.
Paasissutissat allat Facebookikkut takuneqarsinnaapput