Katuaq tapiissutinik ikinnerusunik tunineqarsimasup amigartoornini naammagisimaarpaa

31.771 koruuninik amigartoorneq.

Kulturikkut illorsuaq Katuaq Nuummiittoq ukiumi 2014 taamatut missigersuuteqarpoq.

'Inuiaqatigiinni aningaasaqarnerup nalinginnaasumik ineriartorneranut naleqqiullugu, angusaq naammaginartutut' Katuap siulersuisuinit isigineqarpoq.

Katuap aningaasaliisartui Nunatsinni Namminersorlutik Oqartussat aamma Kommuneqarfik Sermersooq 2014-imi kulturikkut illorsuup ingerlanneqarneranut katillugit 9,9 million koruunit missaannik tapiissuteqarput. Katuaq 2014-imi 32,5 million koruuninik kaaviiaartitaqarpoq.

Aningaasaliissutit ikilisut
- Katuap kommunini nunalu tamakkerlugu kulturimik ineriartortitsinnissamik siunertaqarnermik naammassinnissimanera nuannaarutigaarput. Katuaq 2014-imi nipilersornerup, qitinnerup, isiginnaartitsinerup, saqqummersitsinerit, filmertitsinerit, oqalugiartitsinerit, ataatsimeersuartitsinerit ataatsimiisitsinerillu tungaasigut annertuunik aaqqissuussaqarpoq. Katuap 2014-imi sinerissamut angalaartitsinissaq annertunerusumik sammivaa. Taassuma saniatigut malugineqarsinnaavoq, Nuuk illoqarfittut anginerulersimasoq innuttaqartoq aliikkusersuinermik nerisinneqarnissamillu piumasaqaateqartunik, kulturimillu samminnittut amerlanerulersimasut, Katuami siulersuisuni siulittaasoq Michael Skourup allappoq.

- Tamakkua tamarmik ajunngeqaat, kisianni siulersuisut ugguarput, 2015-imi tapiissutit ikilisimammata. Tamatuma kingunerisaanik Katuap aningaasaqarniarnera tatisimaneqareersoq suli annertunerusumik tatisimaneqarnerulerneranik kinguneqarpoq. Taammaattumik ataatsimoorluta tapiissuteqartartut peqatigalugit siumut isigisumik tapiissuteqartarnermut periusissaq siunissaq isigalugu kulturimik ineriartortitseqataasinnaasoq kiisalu Nunatsinni Kulturikkut Pinngorartitsiffiusumik Qitiusoqarfimmik pilersitsinissamik takorluuinermik timitalersuinissamik ajornannginnerulersitsisoq isumaqatigiissutigisinnaagipput neriuutigaarput.

Katuaq Kommuneqarfik Sermersuumit 2015-imut tapiissutaanit 426.000 koruuninik ikilipput. Namminersorlutik Oqartussanit aningaasanit tapiissutigineqartartut allannguuteqarsimanngitsut Katuami pisortaq Julia Pars Sermtsiaq.AG-mut ilisimatitsivoq.

Katuaq 2014-imi 100.000-it missaanniittunik iserneqarpoq aamma 2014-imi angalaartitsinernik aaqqissuussivoq taamaasillunilu Nuummiinnaanngitsoq pisoqartitsinani Nunatsinni illoqarfinnut arfinilinnut angalaartitsilluni.