atorfiit
Katuaq nutaamik pisortartaarpoq
Tele-Postimi attaveqarnermut pisortaq Arnakkuluk Jo Kleist Katuami juunip aallaqqaataani pisortanngussaaq
33-nik ukiulik Arnakkuluk Jo Kleist Katuami siulersuisuinut 2017-imiilli ilaasortaavoq.
- Arnakkuluk ilaatigut ilisarisimavarput Arctic Winter Games 2016 (AWG2016)-imiinneranit, tassani AWG2016-ip allattoqarfiani pisortap tulliatut sulimmat. Arnakkuluk Jo Kleist Roskildip Universitetiani Kommunikation og Kultur- og Sprogmødestudiet tunngavigalugu kandidatiuvoq, ilinniagaanilu qitiusimapput piorsarsimassutsimut kinaassutsimullu tunngasuteqartut, Katuaq nittartakkami quppernermini allappoq.
Siulersuisllu Arnakkuluk ilaatigut makku peqqutigalugit toqqarsimavaat:
- Siunissamut Takorluuisinnaassuseqarluni pisortaasinnaammat
- Isumassarsiullaqqissuummat aammalu nutaanik eqqarsartuummat
- Attaveqallaqqissuummat/kinaassuseqarluarluni inuullunilu avammut erseqqaarissuusoq
- Kalaallit kulturiannik soqutiginnilluartuummat
- Avammut attavigissaartuummat aammalu aningaasassarsiuillaqqissuulluni
- Siulersuisuni suliaqarnermik misilittagaqarmat
- Siulersuisut Arnakkuluk-p ulluinnarni ingerlatsinermut akisussaasuulerluni periusissanillu nutaanik suleqatit peqatigalugit ilusilersuilerlunilu pisortatut inginnissaa qilanaarivaat. Aammalu siulersuisunit isumalluaatigineqarpoq Katuamut piginnaanerminik iluaqusiilluni tunniussuilernissaa, soorlu avammut attaveqarnerit il.il eqqarsaatigalugit, Katuami siulersuisut sinnerlugit siulittaasoq Anna Heilmann ilisimatitsivoq.