Katuamut isertut ima agguataarsimapput

Suliffeqarfiit 2013-imut missingersuutaat nalunaarutigineqartut qaammammi kingullermi amerlapput.

Missingersuutigineqarsimasunit 57.000 koruuninit kulturikkut illorsuaq Katuaq 33.000 koruuninik sinneqartooruteqarluni nalunaarpoq.

Katuaq 2012-imi 703.000 koruuninik sinneqartoorpoq.

- Katuap siulersuisuisa angusat naammagisimaarnartutut isigaat, siulersuisuni siulittaasoq Michael Skourup oqarpoq.

Nassuiarpaa 2013-imi Katuami ingerlatsineq immikkoortortani kaaviiaartitat missingersuutigineqarsimasunit qaffasinnerusimanerannik sunnerneqarsimavoq. Isertitat aamma missingersuutigineqarsimasunit qaffasinnerupput. Matussutigisassatut aningaasartuutit ilaatigut teknikkikkut sulisunut aningaasartuutinut matussutissatut kiisalu missingersuusiorsimaneq naapertornagu IT-supportimut kiisalu innaallagissamut, imeqarnermut, kiassarnermut, eqqiaanermut kiisalu aserfallatsaaliuinermut iluarsaartussinernullu aningaasartuuteqarnerunermik peqquteqarput.

- Nuannaarutigaarput, Katuaq kommunimi nunalu tamakkerlugu kulturip ineriartortinneqarnissaanik siunertaqarnerup timitalersorneqarnissaani peqataammat. Katuaq 2013-imi nipilersornerit, qitinnerit, isiginnaartitsinerit, saqqummersitsinerit, filmertitsinerit, oqalugiartitsinerit, ataatsimeersuartitsinerit ataatsimiisitsinerillu tungaasigut annertuumik sammisassaqartitsisimavoq, Michael Skorup oqarpoq.

Katuaq 2013-imi ima agguataarsimasunik isertoqarpoq:

• Nipilersorneq Isertut: 12.524
• Isiginnaartitsineq & qitinneq Isertut: 2.247
• Ataatsimiinnerit & Ataatsimeersuarnerit Isertut: 16.163
• Saqqummersitsinerit Isertut: 3.000
• Filmeriat Isertut: 49.057
• Allat (malaatiinn. aliikkus., quiasaarinerit & sammisassaqartits.) Isertut: 5.684
• Oqalugiartitsinerit Isertut: 628
• Katillugit Isertut: 89.303

Siulersuisut katitigaanerat:

• Siulittaasoq Michael Skourup, Kalaallit Nunaanni Takornarialerinermi Inuussutissarsiornermilu Siunnersuisoqatigiinnit toqqarneqarsimasoq
• Siulittaasup tullia Inge Olsvig Brandt, Kalaallit Nunaanni Namminersorlutik Oqartussanit toqqarneqarsimasoq
• Uju Petersen, Kommuneqarfik Sermersuumit toqqarneqarsimasoq
• Hanne Saandvig, Eqqumiitsuliornikkut Pinngorartitsisut Ingerlatsisunit (kattuffimmit EPI-mit) toqqarneqarsimasoq
• Angunnguaq Larsen, Katuami sulisunit toqqarneqarsimasoq

Katuap ulloq 1. april ukiumoortumik ataatsimiinnerani ilaasortat nutaat ukuusut siulersuisunut qinerneqarput:

• Bodil Marie Damgaard, Kalaallit Nunaanni Namminersorlutik Oqartussanit toqqarneqartoq – Inge Olsvig Brandt taarserpaa
• Sebastian Koefoed, Katuami sulisunit toqqarneqartoq – Angunnguaq Larsen taarserpaa

Siulersuisut inissiternerani Michael Skourup-i siulersuisut siulitaasutut qinigaaqqippoq, Uju Petersen-ilu siulittaasup tulliattut qinigaalluni.