assit takukkit
Katuami qitinnermik takutitsineq nuannerluinnartoq
Qitinnermik ilinniarfik Qiajuk Studio, Ruth Montgomery-Andersenimit aqunneqartoq, nuannivissumik qitinnermik takutitseqqippoq
Arfininngormat unnukkut Katuaq ulikkaavippoq. Tamatumunnga pissutaavoq Qiajuk ukiumoortumik qitinnermik takutitsinera. Meeqqat inuusuttullu 100-t missaanniittut ukiup ingerlanerani ballet-imik, jazzimik, nutaaliamik qitinnermik hip hop-imillu ilinniartinneqarsimapput.
Tamatuma inernera arfininngormat Hans Lyngep Inersuaaraani takuneqarsinnaavoq. Isiginnaariat ilarpaalui soorunami angajoqqaajupput, aammattaarli allat kusanartumik takutitsinermik isiginnaariarput.
Qitinnermik ilinniarfik aallussilluartoq
Qitinnermik ilinniarfiup siunertaraa qitinnikkut kulturimik pilersitsineq aammalu meeqqat inuusuttullu sapinngisamik amerlasuut qitinnermik soqutiginnilersinnissaat.
Qiteriaatsit assigiinngitsut saniatigut Qiajuk ukiup ingerlanerani uaaeernermik afrikamiullu qittataannik pikkorissartitsisarsimavoq, taamatuttaarlu Den Kongelige Balletskole-meersumik Ann Crossetimik sammisaqartitsisimalluni koreografi-mik atuartitsilluni.
Inuusuttut pissanganartut
Takutitsinermi meeqqat inuusuttullu katillugit 80-it missaanniittut peqatraapput, angajoqqaallu takkussimasut tulluusimaarutissaqarluarput.
Qitittartut ullup ingerlanerani misileraasimapput, scene ilinniarlugu qitinnerillu takutitassatik naggataamik sungiusarlugit. Takutitsinissaq sioqqutitsiarlugu pissanganerat ersarippoq, annilaangassutissaqanngillalli.
Takutitat assigiinngiiaartut
Qitik assigiinngiiaartorujussuarmik takutitsivoq nuannisarnermik, qalipaatinik, ilumoorussinermik klassiskimillu qitinnermik. Takutitat nikerartut kusanartorujussuarmik ataqatigiissinneqarput, takutitsinerlu kusanartoq imaannaq puigugassaanngilaq.
Naggataatigut ilinniartut diplom-innatsinneqarput, ilinniartullu arlallit, tunniusimalluarsimasut, ineriartorluarsimasut allatulluunniit takutitsisimasut, ersaartaanneqarujussuarlutik akissarsisinneqarput.
Assit ataani takukkit