qinersineq
Kattusseqatigiit Partiiat oqaluttuaannanngorpoq
Kattusseqatigiit Partiaat marsi 2013-imi Inatsisartunut qinersinermi qinersisartunit tununneqarpoq. Siulersuisuunerillu qinersisartut aalajangernerat tusaatissatut maanna tigusimavaat. Partii Inatsisartunut qinissinissamut sassartitaqassanngilaq
Kattusseqatigiit Partiiani siulersuisuunerit sapaammi aalajangerput partii Inatsisartunut qinigassanngortissanngitsoq marsi 2013-mi partiimik qinersisut aalajangernerat pissutigalugu. Taamani Kattusseqatigiit Partiiat nuna tamakkerlugu taamaallat 326-nik qinerneqarpoq.
Partiimik pilersitsisoq, Anthon Frederiksen, isumaqarpoq qinersisartut oqariartornerat ersarissoq.
- Qinersisartut ersarissumik Inatsisartunut kingullermik qinersisoqarmat oqariartuuteqarput. Qinersisartut isumaqarunarput nunatsinni partiit amerlavallaartut. Taamalu aalajangernerat tusaatissaatut maanna tiguarput, partiimik pilersitsisoq aamma Inatsisartuni Naalakkersuisunilu ilaasortaasimasoq, Anthon Frederiksen, Sermitsiaq.AG-mut taama nassuiaavoq.
Atuaruk: Kattusseqatigiit Partiiat – politikkimi immaqa akooqqissanngilaq
Atuaruk: Kattusseqatigiit Partiiat suli ataannarusuppoq
Taarsiullugu siulersuisuunerit maanna misissorpaat Kattusseqatigiit Partiiat partiimut allamut nuussinnaanera.
- Siulersuisut qanoq iliorsinnaanersugut maanna eqqartorpaat. Ulluni aggersuni tamanna pillugu nalunaaruteqarumaarpugut. Kisianni partii nuuffiusinnaasoq Kattusseqatigiit Partiianut tulluartuusariaqassaaq, Anthon Frederiksen, qinigassanngortinniarnerluni suli aalajangersimanngitsoq, taama oqarpoq.