akileraarusiineq

Kattuffiit soraarnerussutisianut aaqqissuusseqqinnernut aarlerisaarisut

Suliatigut peqatigiiffiit kattuffii aamma Sulisitsisut inatsisissasut siunnersuut allanngoqqullugu politikerit kajumissaarpaat

Suliatigut peqatigiiffiit kattuffii arlallit aamma Sulisitsisut soraarnerussutisianut aaqqissuusseqqinneq allanngoqqullugu Naalakkersuisut aamma Inatsisartut kajumissaarpaat, sulisut ilaat soraarnerussutisianut aaqqiissutinik atuisut aningaasaqarnikkut eqqorneqarnerannik kinguneqassammat.

Siusinnerusukkut akileraarusiineq
Sulisitsisut sulisunut soraarnerussutisianut tapiissutaat akissarsiatut nalinginnaasutut akileraaruserneqarnissaat, politikerit kissaatigaat, ullumikkut soraarnerussutisiat ataasiakkaanut akiliutigineqaraangata aatsaat akileraaruserneqartaraluarput.

Namminersorlutik Oqartussat akileraarutinit soraarnerussutisiat katersorneqarnerini pissarsisalernissaat, allannguutit kingunerissavaat, sulisut nunanut allanut soraarninngorlutik aallarlutik soraarnerussutisiatik pigaangamikkit, Nunatta isertitat ullumikkut annaakkajuttarpai.

Sulisut paaqqinnittarfinnut aamma efterskolenut tapiissutit annaaratarsinnaaneri, inatsisit nutaat kingunerisinnaagaat peqatigiiffiit aarlerisaaripput, pappiaqqatigut isertitaat amerlanerulerneri pissutigalugu, naak ulluinnarni aningaasaqarnerat allannguuteqanngikkaluartoq.

Siunertaq malinneqanngitsoq
Inunnut eqqorneqartunut aaqqiissutip aningaasartuutit 800 koruunit tikillugit qaammammut saniatigut aningaasartuuteqarnerulersitsineq kingunerisinnaagaa, peqatigiiffinnit maannamut kisitsinerit takutippaat, tassani ingammik angajoqqaat kisermaat eqqorneqassallutik.

- Tamanna Naalakkersuisut toqqaannartumik siunertaannit, akissarsiortut kalluarneqassanngitsut soraarnerussutisiat akileraaruserneqarnerata siuartinnerani, unioqqutitsineruvoq, Sulisitsisut, IMAK, Atorfillit Kattuffiat, Peqqissaasut Kattuffiat kiisalu NPK Naalakkersuisunut aamma Inatsisartunut ammasumik allagaqarnerminni taama oqariartuuteqarput.

Aningaasaqarnermut Ataatsimiititaliaq
Peqatigiiffiit siornatigut aningaasaqarnermut ataatsimiititaliamut ernumassutitik saqqummiussimagaluarpaat, tamakkuli inatsisitut siunnersuutip pingajussaaneerlugu suliarineqarnerani atortussani ilanngunneqarsimanngillat, atsiortut ilisimatitsipput.

Powered by Labrador CMS