qinersineq
Kattuffiit qinersisartunik ataatsimiisitsilersut
KNAPK, ICC Kalaallit Nunaat, Transparency International kiisalu WWF aqagu pingasunngornermi Katuami qineqqusaartitsilerput
Innuttaasut tusarniarneqartarnerat pitsanngorsaaviginiarlugu qanoq iliuuseqartoqarsinnaava? Qanoq tusarniaasoqartarpat pitsannguutaassava? Kalaallit Nunaanni ineriartornerup innutaasunit tapersersorneqarnissaa qulakkeerniarlugu, politikerit qanorpiaq iliuuseqarniarpat? Aalajangiisoqarniartillugu piaartumik innuttaasut peqataatinneqarnissaat qulakkeerniarlugu, politikerit qanoq iliuuseqarniarpat?
Innuttaasut pitsaanerusumik tusarniarneqartarnissaannut NGO-t suleqatigiit aqagu pingasunngornermi Nuummi, Katuami, nal. 19.00imiit 22.00imut qinersinissamut atatillugu ataatsimiititsinissaanni ilaatigut tamakkua eqqartorneqassapput.
Partiit tamarmik sinniisuutitaat, ataaseq marlulluunniit, Suleqatigiinnit taakkunannga aggersarneqarnikuupput, aatsitassanut atasunik aalajangiisoqassatillugu innuttaasut pitsaanerusumik peqataatinneqarnissaat qulakkeerniarlugu, partiit ataasiakkaat qanoq iliuuseqarusunnersut, innuttaasut tusarniassammassuk. Aatsitassanut atatillugu suliariniakkat assigiinngitsut, innuttaasunit tapersersorneqarlutik ingerlanneqarnissaat qulakkeerniarlugu, kiisalu suliariniakkanut innuttaasut apeqqusiineri ilanngullugit nalilersuisoqartarnissaa qulakkeerniarlugu, NGO-t suleqatigiit innuttaasut pitsaanerusumik tusarniaaffigineqartarnissaat sulissutigaat.
Kattuffiit innuttaasut akuutinnissaat qulakkeerusuppaat
Taamatut sulissutiginninnermi anguniarneqartut ilagaat, sumiiffiit aatsitassanik piiaaffiginiarneqartut uuliasiorfiginiarneqartullu ileqqutoqqat naapertorlugit atorneqartuarnissaannik qulakkeerinissaq, kiisalu pinngortitap avatangiisillu innarlerneqannginnissaat imaluunniit aatsitassanik piiaanermi aalisarnerup piniarnerullu akornuserneqannginnissaasa qulakkeerneqarnissaat.
Qinersisartunik ataatsimiititsinermi tusagassiortut Irene Jeppson aamma Jakob Strøm aqutsisuussapput.
Ataatsimiinneq toqqaannartumik nutserneqassaaq.