pilluarit
Kathrine Rosing nersornaasigassatut innersuunneqartoq
Nunatsinni naliliisartut Kathrine Rosingip meeqqanut atuakkiaa Nunat Avannarliit Siunersuisooqatigiivisa meeqqanut inuusuttunullu nersornaataannut nersorneqarnissaa innersuuppaat
Kathrine Rosingip meeqqanut atuakkiaa 'Nasaq teqqialik piginnaanilik' innersuunneqaatigaa. Nunat Avannarliit Siunersuisoqatigiivisa meeqqanut inuusuttunullu atuakkiortumut nersornaasiinissaannut Kalaallit Nunaannit innersuunneqarluni.
Kathrine Rosing Kangaamiuneersoq maannakkulli Paamiuni najugaqartup Islandimit Savalimmiuninngaanniillu aamma meeqqanut inuusuttunullu atuakkiorsimasut akiisarsisinneqarneranni unammissavai.
Nunat Avannarliit Siunersuisoqatigiivini nersornaaserneqartoq 60.000 koruuninik akissarsitinneqassaaq.
Meeqqanut inuusuttunullu atuakkiortunut arfineq-aappassaa akissarsititsisoqassaaq, akissarsisitsineq ukiup aappaa allorlugu ingerlanneqartarpoq.
Sooq innersuunneqarpa
Naliliisartut tunngavilerpaat sooq atuakkap 'Nasaq teqqialik piginnaanilik' innersuunneqarsimanersoq:
'Meeqqat arfineq-marlunniit aqqanillit tikillugit ukiulinnut atuagaq atuffassissutigineqarsinnaavoq. Atuagaq nutaarpaluttumik oqaluttuarpoq, Manu Paamiuni najugalik kiisalu Miu Kina-mi illoqarfissuarmi najugalik oqaluttuarineqarlutik.
Manup Miu ilaqutaalu Kina-miittut sinnattoraa. Sinnattuni soorlu ilumuuginnartoq. Manup sinnattorsisani angajoqqaaminut atuaqatiminullu oqaluttuarai. Miup aamma Manu Kalaallit Nunaanniittoq sinnattoraa. Sinnattorisaa aamma soorlu ilumuuginnartoq, sinnattorisani angajoqqaaminut aataaminut aanaaminullu oqaluttuaraa.
Atuakkami oqaluttuarluartoqarpoq allanngoraannavilluni. Susassaaleqinarsinngilaq atuakkap atuarnerani, Manup Miullu sinnattuinut nooqattaarnerit eqqarsarnarput. Meeraalluni nammineq atuaraanni atuffatsikkaanniluunniit atuagaq malinnaalluarnarpoq.
Atuagaq allalluagaavoq ilisimasaqalernarlunilu, oqaluttuamimi kalaallit Kina-miullu kulturii naapinnerallu sammineqarpoq' naliliisartut naliliipput.
Savalimmiunit atuagaq 'Flata kaninin' innersuunneqarpoq Bárður Oskarssonimit atuakkiarineqartoq.
Islandimit atuagaq 'Tímakistan' Andri Snær Magnasonimit atuakkiarineqartoq innersuunneqarluni.