partii inuit
Katersuutsitseriarneq avissaartuutsitsivoq
Per Rosing-Petersenip Partii Inuit aamma Partii Naleraq katersuutsinniaraluarsimavai. Siunnersuut annertuumik assortuussutaasimavoq. KNR taama oqaluttuarpoq.
Partii Inuit aamma Partii Naleraq kattunniarlugit siunnersuuteqarnera piffissami kingullermi Partii Inuini eqqissiviilliortitsivoq. KNR taama allappoq.
Partii Inuit maanna siulittaasorisimaligaat, Per Rosing-Petersen, partiit kattutsinniaraluarsimallugit KNR-ip radiomi aallakaatitassiaanut Inuiaat Tillerneranut oqarpoq. Tamanna partiip iluani annertuumik oqallitsitsivoq, nipilu sakkortusimavoq.
Atuaruk: Partii Inuit avissaartuuttut
- Ilutsinni sakkortorujussuarmik, narrujuumminartumik oqariartuuteqartoqarmat, ataatsimeeqataasumit utoqqatsertoqarnissaa kissaatigineqarpoq. Tamannalu pinngimmat taavalu immaqa ataatsimiinnermi oqaatsit sakkortuut atorneqarnerat amerliartuinnarmata, uanga tassa peqataasinnaajunnaarlunga oqarpunga, qanoq ataatsimoortitsisinnaanissara takusinnaannginnakku, Per Rosing-Petersen Inuiaat Tillernerannut taama oqarpoq.
Atuaruk: Per Rosing-Petersen Partii Inuit siulittaasortaaraat
Sapaatiummat siulersuisunut ilaasortat tallimat peqatigalugit partiimit tunuarput.
Per Rosing-Petersen politikkikkut tamalaanik suliaqartarsimavoq. Taanna 1999-imi attaviitsutut Inatsisartunut ilaasortanngorpoq. Siumumullu ilaasortanngorluni.
Atuaruk: Per Rosing-Petersen: Ajalusoornavianngilanga
Hans Enoksen 2014-imi Siumumit tunuarmat, Per Rosing-Petersen tunuaqataalluni Enoksenip partiiani nutaami Partii Naleqqami siulittaasup tullinngorpoq.
Atuaruk: Rosing-Petersenip ammip qalipaataanik immikkoortitsinermik oqaaserisani aalajangiusimagai
Arlaleriarluni akerleriiffiusunik oqariartuuteqartareerluni, Inatsisartunilu oqallinermi Kalaallit Nunaat Afrika Kujallermi ammip qalipaataanik assigiinngisitsilluni naalakkersuisunermut assersuussinermi kingorna, Per Rosing-Petersen siorna aggustimi Partii Naleqqamit anivoq.
Atuaruk: Partii Naleqqamit anisitaasoq
Qaammatit arlaqanngitsut qaangiuttut Partii Inuini saqqummerpoq, tassanilu ingerlaannaq siulittaasunngorluni. KNR-ilu naapertorlugu maanna Partii Naleqqamut uteqqinnialerpoq.
Atuaruk: Killiffik: Nikku Olsen taaguunneqarnerit pingajoraat