Karlsenip oqaasii IA-mit isumaqatigineqartut

- Aalisarneq pillugu politikkikkut siammasissumik isumaqatigiissusiortoqarnissaa pisariaqarpoq.

Inuit Ataqatigiit Inatsisartuni gruppia oqariartuuteqarpoq. Aalisarneq pillugu isumasioqatigiinnermi Hotel Hans Egede-mi Nuummi ingerlanneqartumi IA-mit Ane Hansen, Sara Olsvig, Naaja Nathanielsen, Juliane Henningsen aamma Hans Aronsen peqataatinneqarput.

Aalisarnermut, piniarnermut nunalerinermullu naalakkersuisup Finn Karlsenip ilaatigut uku isumasioqatigiinnerup ammaanersiornerani oqaasii isumaqatigineqarput:

- Aalisarnerup Kalaallit Nunaata aningaasaqarnerani maligassiuiffiuinnarnissaa taamatullu aamma aalisarnerup Kalaallit Nunaannut tamarmiusumut iluaqutaaginnarnissaa kissaatigaara. Taamaattumik aalisarneq aamma ataatsimoorutissavarput. Aqutsineq, aalisartut suliffissuaqarnerlu. Siunissami aalisarneq sapinngisamik pissarsiaqarfiginiarlugu suleqatigiissaagut.

Aalisarnerup nunatsinnut pingaaruteqassusaa Inuit Ataqatigiinnit ersersinniarneqarpoq.

- Aalisarneq tassaavoq nunatsinni aningaasarsiornikkut inuussutissarsiuut pingaarneq. Avammut tunisaqarnitsinni tunisat 90 procentii sinnerlugit aalisarnermit pipput aalisarnerlu ajutuussagaluarpat Nunatta BNP-nut inuussutissarsiutinullu arlaqartunut allanut annertuumik sunniutipiloqartussaavoq.

- Inuit Ataqatigiinnit aalisarnermi pissutsit isumatusaartumik tunngavilersorluakkamillu politikkikkut suliaqarfiginissaa pingaartittuarparput. Aalisarneq pillugu partiit akornanni siammasissumik isumaqatigiissusiorsinnaaneq tassani qitiulluinnarpoq. Aalisarnikkut piorsaaneq piffissaq ungasinneq isigalugu sunniuteqarluarnissaa qulakkeerumallugu qinigaaffiit akimorlugit kikkulluunniillu Naalakkersuinikkut siuttuugaluartut aalisarneq pillugu politikki attanneqarsinnaasariaqarpoq.

Inuit Ataqatigiinnit aalisarneq pillugu uku pisariaqartutut isigineqarput:

• Aalisarnermut inatsisiliornissami Naalakkersuisut partiinut tamanut qaaqqusisariaqarput
• Avataasiortut sineriassiortullu pisassanik noqqoruuttuusinerat unitsinneqartariaqarpoq. Tamarmik inissaqarput atorfissaqartinneqarlutillu.
• Tulaassisussaatitaaneq, pisassiissutit, aqutsisoqarfiit, akileraarutit, akitsuutit, tunitsiveqarneq, tapiissuteqarneq kinguaariillu nikittarnerannut tunngasut sukumiisumik eqqartorneqarlutillu isumaqatigiissusiorfigineqartariaqarput.

- Politikkikkut siammasissumik isumaqatigiissususiorneq aalisarnerup inuussutissarsiutitut aalisarnermilu sulialinnut tamanut toqqissisimanartumik ineriartortitsisinnaanissamik pilersitsissaaq. Aalisarnermut politikki katersuuffiusariaqarpoq politikkikkullu suliaqartugut tamattaalluta akisussaaqataavugut.

Inuiaqatigiittut politikkikkut aalisarnerup akilersinnaassusaanut patajaassusaanullu uuttuutaat tassaapput:

• Aalisarnermik inuussutissarsiornerup innuttaasunit aningaasarsiorfiunissaa suliffissaqarfiunissaa
• Aalisarnermit aningaasanik kaaviiaartitat nunatta karsianut iluaqutaanissaat
• Aalisarnerup ilinniarfittut imminullu pilersornermut aqqutissatut nukittorsarnissaa

Aalisarneq pillugu isumasioqatigiinnermi siunertarineqarpoq nunatsinni aalisarnermi unammilligassat suussusersineqarlutillu eqqartorneqarnissaat kiisalu aalisarnerup aningaasarsiornikkut peqassuserlu eqqarsaatigalugit attanneqarsinnaasumik ingerlanneqartariaqarneranut sinaakkutissanik naleqqussaasariaqarnissamik eqqartuinissaq. Isumasioqatigiisitsineq ullumi sisamanngornermi naammassineqassaaq, naammassippallu nerersuaaqatigiittoqassalluni.

Atuaruk:Aalisarneq pillugu isumasioqatigiinneq