hvalfangst
Karl Lyberth suleqatigiinnissamik kaammattuivoq
Assuarnarpoq Danmark arfattassanut apeqqummi aalajangiissappat, Kalaallit Nunaat peqataatinnagu, Karl Lyberth isumaqarpoq
Arfattassavut qanoq amerlatigissanersut Kalaallit Nunaata aalajangiiffigeqatigiliuk.
Aviisimi ullormut saqqummersartumi Politiken-imi isumaliutersuummi allappoq aalisarnermut, piniarnermut nunalerinermullu Naalakkersuisoq Karl Lyberth, Siumut.
Siorna IWC-p ukiumoortumik ataatsimiinnerani Kalaallit Nunaata 2013-imiit 2018-imut arfattassaanik aalajangiisoqanngilaq.
– Tamanna tunuliaqutaralugu nunanut allanut ministereqarfiup piumasarisimavaa Kalaallit Nunaat IWC-mut nutaamik siunnersuuteqassasoq, tamatumuunali biologit arferit qanoq amerlatigisut pisarineqarsinnaanerannik siunnersuinerannit ikinnerusunik. Tamanna Kalaallit Nunaata akuersaarsinnaasimanngilaa, Karl Lyberth oqarpoq.
Suleqatigiikkunnaarneq?
Nangipporlu:
– Siumut 2011-mi Socialdemokratinik suleqatigiinnissamik isumaqatigiissuteqarmat aammalu Socialdemokratinut SF-imullu naalakkersuisunut tunngavimmik isumaqatigiinniartoqarmat arfanniarnermut IWC-mullu periusissavut isumaqatigiissutigisimavagut.
– Taamaattumik tupigusuutigaara arfanniarneq pillugu apeqqummi qallunaat naalakkersuisuisa Kalaallit Nunaat tapersersorunnaarmagu, Karl Lyberth oqarpoq.
Isumaliutersuut tamaat atuarsinnaavat uani.