pisassiissutit

Karl Lyberth: Saarullittassat ilaneqaqqillik

Aalisartut ukioq tamaat aalisarsinnaasariaqartut Siumumit Karl Lyberth isumaqarpoq

Siumumit Karl Lyberth saarullittassanik pisassiisoqaqqissasoq Naalakkersuisunut kaammattuuteqarpoq

Naalakkersuisut partiit siulittaasuinik taperserneqarlutik sinerissap qanittuani saarullittassiissutit novembarip sisamaani 1.500 tonsinik ilavaat.

Aalisarsinnaannermut Akuersissutinik Nakkutilliisoqarfimmit marlunngornermi nalunaarutigineqarpoq saarullinniarluni aalisarneq pingasunngornermi novembarip 19-ani unitsinneqartussanngortoq pisassiissutit nungulermata, tamanna Sermitsiaq.AG-mit allaaserineqarpoq.

Saarullittassat nungutsinnagit saarullittassat ilaneqartariaqartut Siumumit Karl Lyberth Naalakkersuisunut kaammattuuteqarpoq.

- Sinerissami aalisartorpassuarnut pingaaruteqaqimmat, pingaartumik aalisartunut annerusumik qaleralinnik isumalluuteqanngitsunut pingaaruteqaqimmat, matumuuna Naalakkersuisuugallartunut kajumissaarutigissavara saarullittassat nungutsinnagit ukiup sinneranut naammattunik pisasseeqqinnissamik suliniuteqalereeqqullugit, tusagassiutinut nalunaarummi Karl Lyberth allappoq.

Ukiup sinneranut pisassat minnerpaamik 2.500 tonsinik ilaneqarsinnaasut oqarpoq.

- Allaalluunniimmi imatut saarulleqartigilernikuuvoq allaat eqqarsaqqajaanarluni saarulliit killilersorunnaarlugit sinerissap qanittuani tamakkiisumik ammarneqarpata pissusissamisuuginnassasoq, Karl Lyberth Inatsisartunut novembarip 28-anut qinersinissamut qinigassanngortittoq oqarpoq.

Powered by Labrador CMS